د نړۍ اوو بډایو هېوادونو د (G7) په کلنۍ سرمشریزه کې هوکړه کړې چې د روسیې له ګنګل شوې شتمنۍ څخه ترلاسه شوې ۵۰ میلیارد ډالره ګټه دې اوکرایین ته ځانګړې شي.
اسوشیټيدپرس پنجشنبه د جون پر ۱۳مه د دغو مشرانو په حواله راپور ورکړی چې دا مرسته د اوکرایین د پاېښت لپاره شوې ده.
بل پلو، امریکايي او فرانسوي چارواکو د هوکړې له رسمي اعلان وړاندې ویلي چې ښايي دا پیسې کییف ته د کال له پای ته رسېدو وړاندې ورسېږي.
د راپور په حواله، ډېرې پیسې به د پور په بڼه وي چې امریکا یې تضمین کوي او د روسیې له ولاړو شاوخوا ۳۰۰ میلیارد ډالرو شتمنیو له ګټې به راځي.
په راپور کې راغلي چې د دغو پیسو ډېره برخه به د اروپايي ټولنې په هېوادونو کې ساتل کېږي.
ورته مهال، یو امریکايي چارواکي د نوم نه اخیستو په شرط ویلي چې د جي – ۷ مشرانو رسمي ویناپاڼه به سبا(جمعه) خپره شي.
د نړۍ د اوو بډایو هېوادونو امریکا، کاناډا، بریتانیا، جرمني، جاپان، فرانسې او ایټالیا مشرانو دا ناسته د ایټالیا په سوېل اپولیا کې روانه ده.
یاده دې وي چې د جي – ۷ په دې درې ورځنۍ سرمشریزه کې پر اوکرایین سربېره د غزې پر جګړه، کډوالۍ، اقتصادي امنیت او مصنوعي ځیرکتیا (AI) پر خوندیتابه هم خبرې کېږي.
