د راپورونو په حواله، د اوکرایین شمال د «سومي» ښار پر مرکز د روسیې د هوايي بمبارۍ په پایله کې ۳۲ کسان وژل شوي او ۸۳ نور ټپيان دي.
رویټرز خبري اژانس د اوکرایین د کورنیو چارو وزیر له قوله راپور ورکړی چې دا بریدونه یکشنبه د اپريل پر ۱۳مه سهار مهال شوي دي.
نوموړي دا برید «په قصدي توګه د ملکیانو» په نښه کول بللي او زیاته کړې ده چې ډېریو کسانو ته په سړکونو او استوګنځيو کورونو کې مرګ ژوبله اوښتې ده.
اخوا د اوکرایین ولسمشر ولادیمیر زېلنسکي بیا په روان کال کې دا روسیې مرګوني بریدونه ګڼلي او د وژل شویو شمېر یې ۳۱ کسان ښودلی دی.
هغه د مسکو پر وړاندې د کلک نړیوال غبرګون غوښتنه کړې ده.
تر اوسه روسي چارواکو په دې اړه څه ویلي نه دي.
سومي ښار د روسیې او اوکرایین پولې په ۵۰ کیلومترۍ کې پروت دی.
کییف اوونۍ وړاندې پر دې سیمې د روسیې له احتمالي بریدونو خبرداری ورکړی و.
