په هرات کـې د ګازو د ټانکرونـو سوځېدو کابو یو میلیون ډالر مالي زیان اړولی دی

د هرات سیمه ییز چارواکي وايي چې د هرات په شمال کې د ګازو په زېرمتون کې د اورلګېدنې له امله د ګازو لس ټانکرونه سوځېدلي دي.
د هرات د والي ویاند جیلاني فرهاد ۸صبح ته وویل چې دغه اور په کابو درېيو ساعتونو کې د ۲۰۷ قول اردو د اور وژنې ډلې په همکارۍ مړ شو.
د هغه په وینا، دغه اورلګېدنه د وري په ۲۱مه د سهار په اوو بجو د خوندیتوب ټکو ته د نه پاملرنې له امله له یوه ټانکره بل ته د ګازو د لېږد پر مهال پيل شوه او یو تن ټپي شو.
هغه تصویرونه چې د اورلګېدنې له لومړنیو شېبو په ټولنیزو شبکو کې خپاره شوي پکې ښودل شوي چې د ګازو څو ټانکرونه د چاودېدو په حال کې دي.
له بلې خوا، د هرات د ګازو د واردوونکو ټولنې رییس وايي چې په دغه پېښه کې یو د تېلو او یو هم د ګازو ټانکر او کابو شل د ګازو تش ټانکرونه او زېرمې سوځېدلې دي.
هغه زیاته کړه چې د لومړنیو څېړنو له مخې، اورلګېدنې کابو یو میلیون ډالر مالي زیان اړولی دی.
د هرات ښار په کمرکلاغ سیمه کې د ګازو او تېلو په لسګونه شرکتونه او زېرمتونونه فعالیت لري.
څو کاله مخکې هم په دغه سیمه کې د ګازو په یوه شرکت کې د اورلګېدو په پېښه کې درې تنه مړه شول او ډېر مالي زیانونه یې اړولي وو.