نږدې ۹۰ سلنه وګړي لږ تر لږه له ټولنیزو نورمونو څخه رامنځته شوی جنسیتي تعصب او تنګنظري لري. دا شمېرې د ملګرو ملتونو د پراختیايي پروګرام له خوا د یوې مطالعې په پاېله کې ترلاسه شوې دي. په تېرو څو لسیزو کې دې سلنه وګړو ډېر لږ بدلون کړی دی.
د ښځو پر وړاندې تعصب زموږ د ژوند ټولو برخو ته د ننوتو لاره پېدا کوي. د بېلګې په ډول، په ښکاره د ناڅېزو شیانو لکه زموږ د جامو یا خبرو کولو له څرنګوالي نیولې بیا تر لویو او مهمو مسلو پورې لکه دا چې څوک کولای شي یو هېواد اداره کړي یا ان دا چې څوک لومړنیو بشري حقونو ته د لاسرسي وړ دي، دا ټول رانغاړي. دا عادتونه او نورمونه په داسې بڼه زموږ په روح کې ځای ځای پر ځای کېږي چې ښايي په ځان یا نورو کې یې پېژندنه ګرانه وي. که کله هم وغواړو پېژندنه یې پېل کړو، ښايي پر هر یوه یې ټينګار د شخړو او تضادونو لامل شي چې دا یوازې جنسیتي تشې لا ژوروي. دا ډول پېښې هره ورځ په انلاین مجازي نړۍ کې وینو. پوښتنه دا ده چې څنګه کولای شو دا تشې ډکې کړو او له منځه یې یوسو.
په دې برخه کې رسنۍ او خبري وېبسایټونه کولای شي مهم رول ولوبوي. د حیرانتیا خبره نه ده چې په خبریالۍ کې هم جنسیتي تنګنظري ښکاري؛ داسې چې کوم مسایل د خبرونو سرټکي او پېښو ته څنګه پوښښ ورکړل شي. که څه هم ناڅاپي او یوځلي بدلون ممکن نه دی؛ خو اړینه ده چې پام ورته وشي چې څنګه د جنسیت له مخې ټولنیز نورمونه پر خبري پوښښ اغېز پرېباسي او په دې برخه کې دې تر یو بریده له تتوالي او سادهسازیو سره مقابله وشي.
سږ کال د ښځو نړیوالې ورځې په مناسبت، ۸صبح ورځپاڼه له سپارکنیوز او د نړۍ په ګوټ ګوټ کې له ۱۶ نورو خبري رسنیو سره په ګډه، په ۲۰۲۴ کال کې د ښځو او نجونو وضعیت ته یوه نړیواله کتنه کوي.
د دغه کمپاین له لارې په پام کې لرو هغه خنډونه چې لا هم د جنسیتي برابرۍ پر وړاندې شته، له منځه یوسو او دغه راز ښځينهوو، نارینهوو، نادولتي بنسټونو، مدني خوځښتونو او پالیسو لپاره چې په بېلابېلو برخو کې د جنسیت تشې په ګوته کوي، څرګند کړو.
د افغانستان، ارجنټاین، برازیل، فرانسې، جرمني، جاپان، کینیا، لبنان، مراکش، نایجیریا، هسپانیې، سویس او امریکا په خبري رسنیو کې د دغو نکلونو تقاطع او نښلېدنه به له موږ سره مرسته وکړي؛ څو د ښځو وضعیت په یو پراخ انځور کې وګورو. جنسیتي برابري یوازې د ښځو لپاره نه؛ بلکې په نړیواله کچه زموږ ټولو لپاره یو لومړیتوب دی. که د ښې نړۍ د رامنځته کېدو په لټه یو یا یې هیله لرو؛ باید جنسیتي تعصب او تنګنظري څنګ ته کړو. ښه نړۍ، تنګنظره کېدای نه شي.
