۸صبح، کابل: په کابل کې د معترضانو د نیولو د غبرګونونو په دوام، اوس د افغانستان لپاره د جرمني سفیر ویلي، چې منتقدانو ته باید د دښمن په سترګه ونه کتل شي.
د افغانستان لپاره د جرمني سفیر پوټزل مارکُس چې په دوحه کې دی، د جمعې پر ورځ د سلواغې پر ۱۵ يې د یوه ټويټ له لارې په کابل کې د معترضو مېرمنو نیول ناقانونه او ناعادلانه چلن بللی دی.
سفیر پوټزل ویلي: «له معترضانو سره باید د دښمن په شان چلند ونه شي، د دوی بې درکه کېدل یا وژل ناقانونه او ناعادلانه چاره ده.»
هغه پرته له دې چې د کومې ډلې نوم واخلي، څرګنده کړې چې نړۍ په ځیر دا وضعیت څاري.
د افغان مېرمنو لپاره د امریکا ځانګړې استازې رینا امیري هم په یوه ټویټ کې په کابل کې د ښځینه اعتراض کوونکو نیول کېدل ناعادلانه بللي او زیاته کړې یې ده، چې ژر تر ژره باید دا کړنې ودرول شي.
دا په داسې حال کې دي چې په تېرو دوو اوونیو کې په کابل کې لږ تر لږه څلور معترضې مېرمنې بې درکه شوې دي.
د مرسل عیار او زهرا محمدي بې درکه کېدل هغه تازه موارد دي، چې په اړه یې رپوټ ورکړل شوی.
