۸صبح، کابل: په کابل ښار کې سرچینې وايي چې د دغه ښار په ځينو برخو کې د باران او ږلۍ ورېدو وروسته سېلابونه راوتلي چې د مالي زیان ترڅنګ یې د خلکو د تګراتګ په لارو کې هم خنډونه جوړ کړې دي.
نن سهشنبه د زمري پر ۳۰مه له غرمې وروسته کابل ښار کې باران او ږلۍ ووریده چې وروسته د دغه ښار په دشت برچي، میرویس میدان او خیرخانې اړوند د مارشال فهیم سړک کې سېلابي اوبه د خلکو کورونو او دوکانونو ته ننوتې.
له یادو سیمو سرچینو ۸صبح ورځپاڼې ته منلې چې همدا اوس هم خلک له خپلو کورونو څخه د اوبو پر ایستلو بوخت دي.
دغه راز، د وروښتونو لامله د کابل ښار ځينې سړکونه له اوبو ډنډ شوي چې تګ راتګ یې له خنډ سره مخ کړی و.
تر اوسه د دغو ورښتونو لامله د اوښتي مالي او ځاني زیانونو په اړه کره معلومات نه شته.
طالبانو هم تر دې دمه په دې اړه څه ویلي نه دي.
د یادونې ده چې د تېرو دوو ورځو په لړ کې په غزني، پکتیکا، میدانوردګ او پنجشیر کې هم سېلابونه راوتلي وو.
