له بايډن سره د غني او عبدالله ليدنه؛ د وتلو پروګرام کې بدلون رانغی، خو امريکا له افغانستانه د ملاتړ ژمنه تازه کړه
۸صبح، کابل: ولسمشر محمد اشرف غني او د ملي روغې جوړې عالي شورا رئيس عبدالله عبدالله او مل پلاوي يې د چنګاښ مياشتې په څلورمه جمعه مازديګر د امريکا ولسمشر جو بايډن سره په سپينه مانۍ کې وليدل.
د امريکا ولسمشر په دې ليدنه کې اعلان وکړ چې امريکايي ځواکونه له افغانستانه بهر کېږي، خو له افغانستانه د امريکا ملاتړ دوام کوي.
ولسمشر غني هم په دې ليدنه کې له افغانستانه د بهرنيو ځواکونو د وتلو په اړه د بايډن تصميم تاريخي ګڼلی او ټينکار يې کړی چې دې تصميم ته احترام لري او ترې ملاتړ کوي.
د سپيڼې ماڼۍ د اعلان مطابق بايډن په دې ليدنه کې د افغان ښځو، نجونو، لږکيو په ګډون د افغانستان له خلکو څخه د امريکا تلپاتې ملاتړ او غير پوځي، پرمختيايي او بردوستانه مرستو دوام باندې ټينګار کړی دی.
د امريکا ولسمشر همداراز ژمنه کړې چې افغان امنيتي ځواکونو سره به د امریکا مرستې دوام وکړي.
بايډن په دې ليدنه کې ټينګار کړی چې د افغانستان مشران بايد د دې هېواد سولې او ثبات په اړه يو نظر ولري او يووالي ته ورسېږي.
جو بايډن ويلي چې که څه هم امريکايي سرتېري افغانستان پرېږدي، خو دوامداره او دوه اړخيزه ملتيا او مشارکت به دوام ومومي.
په ورته وخت کې د امريکا سنا مجلس د لږکيو برخې مشر ميچ مکانل هغه وړانديز چې له بايډن يې غوښتي ؤ څو د ځواکونو د وتلو پروسه وځنډوي، ونه منل شوه. ميچ مکانل دغه وړانديز له غني او عبدالله سره په ليدنه کې وړاندې کړی ؤ.
بايډن همدرانګه ټينګار کړی چې د افغانستان او امريکا مشارکت پايته نه رسېږي او دوام به ومومي.
هغه زياته کړه، امريکايي سرتېري له افغانستانه وځي، خو له افغان پوځ سره د مرستې او اقتصادي او سياسي ملاتړ په برخو کې به له افغانستانه د امريکا ملاتړ پايته ونه رسېږي.
ولسمشر جو بايډن زياته کړه چې افغانان بايد خپله د خپلې راتلونکې په اړه تصميم ونيسي، خو امريکا به خپلې همکارۍ ته دوام ورکوي.
بايډن همدرانګه د «بې ګټې» تاوتريخوالي په فوري بندېدو ټينګار کړی دی.
په مقابل کې ولسمشر غني هم له افغانستانه د بهرنيو ځواکونو د وتلو په اړه د بايډن تصميم تاريخي ګڼلی او ټينکار يې کړی دی چې دې تصميم ته احترام لري او ترې ملاتړ کوي.
د ولسمشر غني په وينا، امريکا او افغانستان د خپلو اړيکو نوي فصل ته د ننوتو په درشل کې دي او دې تصميم ته درناوی لري او ملاتړ ترې کوي.
د سپينې ماڼۍ لخوا په خپرې شوې خبرپاڼه کې راغلي چې د سولهييز او باثباته افغانستان لپاره امريکا له ډيپلوماتيکو لارو اقتصادي همکاريو او مرستو ته دوام ورکوي.
په خبرپاڼه کې راغلي، دا چې افغانستان بياځلې د ترهګرو پټنځای باندې وانه وړي، نو له افغانستان سره به د امريکا مشارکت او ملاتړ روان وي.
سپيڼې ماڼۍ په افغانستان کې د ثبات، اقتصادي ودې، د ښځو او لږکيو په شمول د تېرو ۲۰ کلونو لاسته راوړنو پر ساتنې ټينګار کړی دی.
د سپينې ماڼۍ د اعلان له مخې، امريکا له ۲۰۰۲ کال راهيسې له افغانستان سره د امنيت په برخه کې ۸۸ ميليارد ډالره، په غير نظامي برخه کې ۳۶ ميليارد ډالره، د ښځو او نجونو په برخه کې ۷۸۷ ميليونه ډالره او نږدې ۳.۹ ميليون ډالره بشردوستانه مرستې کړې دي.
جو بايډن له غني او عبدالله سره په ليدنه کې همداراز له افغانستان سره د امریکا د درې ميليونه ډوزه کرونا واکسين د مرستې يادونه هم وکړه. هغه همدارنګه په دې برخه کې د لا همکارۍ ژمنه کړې ده.
ولسمشر محمد اشرف غني او عبدالله عبدالله د چنګاښ په دويمه امريکا ته ولاړل. دوی په دې سفر کې د امريکا دفاع وزیر، سناتورانو، د ملي امنيت سلاکار، د امريکا سياسي څېرو، امريکايي سرتېرو د قربانيو کورنيو او د امریکا سنا مجلس رئيسې سره يې وليدل.
