غني: افغانستان د سقوط په پړاو کې نه دی

د هېواد ولسمشر محمد اشرف د نظامي ګنجوي د نړیوال مرکز په ناسته کې ويلي چې افغانستان د سقوط په پړاو کې نه دی.
د نظامي ګنجوي د نړیوال مرکز ناسته د وري په ۲۶مه نېټه د آذربایجان حکومت په نوښت د دغه هېواد په پلازمیني باکو ښار کې ترسره شوې وه.
محمد اشرف غني په دغه ناسته کې د ویډیو کنفرانس له لارې د افغانستان د سولې بهیر په اړه ، له افغانستانه د امریکا او ناټو ځواکونو د وتلو د پرېکړې او همداراز د سیمه ییزو همکاریو په اړه خبرې وکړې.
ولسمشر ددې په بیانولو سره چې افغان امنیتي ځواکونه د ګواښونو په وړاندې د دفاع وس لري زیاته کړې چې افغانستان د سقوط په پړاو کې نه دی. هغه جوته کړې: «زموږ امنیتي او دفاعي ځواکونه له هېواده د خپلواکې دفاع توان لري او له څو کلونو راهیسې ۹۴ سلنه عملیات په خپلواکه توګه ترسره کوي.»
ولسمشر غني تر سپتمبر میاشتې پورې د امریکايي ځواکونو د وتلو لپاره د نوموړي هېواد د ولسمشر جوبایډن د پرېکړې په هکله ویلي چې دغې پرېکړې ته درناوی لري او په دې بهیر کې همکاري کوي.
د ښاغلي غني په باور، دا پرېکړه د دې لامل شوه چې له افغانستانه د بهرنیو ځواکونو د وتلو یا نه وتلو په اړه د خلکو اندېښنې لیرې شي.
د ولسمشر په وینا، اوس افغانستان له یوې خوا د سولې او د سیمې د نښلولو او سیمه ییزو همکاریو په شان نوي بهیر سره او له بله پلوه له سیمې اخوا ترهګرو او جرمي شبکو سره مخامخ دی.
محمد اشرف غني ټینګار کړی چې د ترهګرۍ او جرمي شبکو له امله کړکېچ د مدیریت لپاره باید له افغانستان سره همکارۍ دوام وکړي.
هغه ټینګار کړی: «زموږ خلک له ۴۲ کلونو راهیسې سولې ته د رسېدو لپاره له خپل مشروع حقه بې برخې پاتې دي.»
ولسمشر، سوله ییز، باثباته او له جګړې او تاوتریخوالي پرته افغانستان د سیمې له هغې جملې پاکستان په ګټه وباله.
محمد اشرف غني همداراز د ښځو د رول په هکله خبرې وکړې او وې ویل چې په ټولو برخو کې د افغان مېرمنو ونډه زیاته شوې، اوس دوی غږ پورته کوي او د سولې په اړه خپل نظریات مطرح کوي.
ولسمشر د سولې لپاره د خپلې طرحې یادونه کړې او ویلي یې دي چې دا نقشه پر درېیو ستنو ولاړه ده. دا درې برخې اوربند، د تلپاتې او عادلانه سولې ټینګښت او د ټاکنو ترسره کېدل دي. محمد اشرف غني یو ځل بیا ژمنه کړې چې سولې ته د رسېدو لپاره چمتو دی چې له وخته مخکې ټاکنې ترسره کړي.
ولسمشر غني همداراز د کاسا زر او نوري فایبر په شان لویو سیمه ییزو پروژو عملي کول د افغانانو او سیمې هېوادونو د ژوندانه د شرایطو د ښه کولو لپاره ګټور بللي دي.