۸صبح، کابل: یوناني چارواکو ویلي چې د دغه هېواد په سواحلو کې د ډوبې شوې کښتۍ قربانیان ټول افغانان دي.
اسوشیېټډپرېس یکشنبه د مرغومې پر ۲مه، د یوناني چارواکو په حواله راپور ورکړی چې د دغه هېواد ژغورونکو ټیمونو ۱۸ کسان له اوبو څخه را ایستلي او ټول افغانان دي.
د راپورونو پر بنسټ، له دې ډلې څخه اتو کسانو ژوند بایللی او پاتې نور یې روغتون ته لېږدول شوي دي.
په راپور کې ویل شوي چې دا کښتۍ د جمعې پر ورځ د یونان ساحلي ګارد له یوې ګزمې کښتۍ څخه له تیښتې وروسته ډوبه شوې ده.
یوناني چارواکو زیاته کړې چې په ژغورل شویو کسانو کې ۱۲ نارینه، درې ښځې او درې ماشومان شامل دي.
همداراز دوه ترکان هم د دې پناهغوښتونکو د قاچاقبرانو په تور نيول شوي دي.
دا په تېره یوه اوونۍ کې د یونان په سواحلو کې دویمه مرګژوبله ده.
له دې مخکې هم په دا ډول پېښه کې اووه کسان مړه شوي وو.
د يادونې ده چې د سوریې له خلکو وروسته افغانان په پراخه کچه او ناقانونه توګه يونان ته سفر کوي.
