د ملګرو ملتونو سرمنشي ګوتېرېش، وايي چې په تېر یوه کال کې د نړۍ په بېلابېلو هېوادونو کې لږ تر لږه ۳۴ خبریالان وژل شوي دي.
ګوتېرېش دوشنبه د لړم پر ۱۱مه، د خبریالانو پر وړاندې د جرمونو د معافیت د پای ته رسولو د نړیوالې ورځې په مناسبت د هغوی د خوندیتوب غوښتنه کړې ده.
هغه زیاته کړې چې د نړۍ په ګوټ ګوټ کې خبریالان د حقیقت د بیانولو لپاره درنه بیه پرې کوي.
د ګوتېرېش په وینا، خبریالان ډېری وخت له ځورونې، څارنې، قضايي دعوو، فزیکي بریدونو او زنداني کېدو سره مخ کېږي.
د ملګرو ملتونو سرمنشي ټینګار کړی چې هېڅ شی باید د خبریالانو د فعالیت مخه ونه نیسي؛ هغه فعالیت چې د بشري حقونو، ډیموکراسۍ او د قانون د حاکمیت لپاره اړین دی.
هغه زیاته کړې چې د دې موخې لپاره باید ټولې قضیې وڅېړل شي، عاملان يې محاکمه شي او پر خبریالانو انلاین بریدونه پای ته ورسېږي.
