۸صبح، کابل: ملګرو ملتونو له طالبانو غوښتي چې په دغه سازمان کې د افغان ښځو پر کار لګېدلی بندیز ژر تر ژره لغوه کړي او پر ښځو او نجونو لګېدلي محدودیتونه پای ته ورسوي.
د ملګرو ملتونو سرمنشي انتونیو ګوټرېش يکشنبه د وږي پر ۱۵مه، په یوه اعلامیه کې ویلي چې د طالبانو تبعیضي سیاستونو د افغان ښځو او نجونو د ژوند پر ټولو برخو اغېز کړی او د هېواد د اقتصادي پراختیا او ثبات پر وړاندې جدي خنډ دی.
ګوټرېش ویلي چې پر زدهکړو، کار او په عامه ژوند کې د ښځو پر ګډون لګېدلي محدودیتونه د هغوی اساسي حقونه نقضوي او له نړیوالې ټولنې سره د افغانستان د بېرته یوځای کېدو بهیر هم ستونزمنوي.
د ملګرو ملتونو سرمنشي ټینګار کړی چې خپلو کاري ځایونو ته د دغه سازمان د کارکوونکو بېخنډه لاسرسی د افغانستان خلکو، په ځانګړې توګه ښځو او نجونو ته د بشري مرستو د رسولو لپاره اړین دی.
ګوټرش له طالبانو غوښتي چې د ملګرو ملتونو مرکزونو ته د ښځو د خوندي او بېخنډه لاسرسي زمینه برابره کړي او اجازه ورکړي چې ښځې د ښځو او نجونو لپاره د بشري مرستو او بنسټیزو خدمتونو په وړاندې کولو کې ونډه واخلي.
