۸صبح، کابل: د ملګرو ملتونو سرمنشي انتونیو ګوتېرېش د طالبانو له خوا پر ښځو لګول شوي محدودیتونه غندلي او غوښتنه یې کړې چې پر هغوی ټول لګېدلي محدودیتونه لغوه شي.
ګوتېرېش سهشنبه د وږي پر ۱۷مه په اېکس پاڼه کې لیکلي چې پر افغان ښځو او نجونو د طالبانو د دوامدارو تبعیضي تګلارو له امله ژوره اندېښنه لري.
د ملګرو ملتونو سرمنشي ویلي چې دا محدودیتونه د افغان ښځو د ژوند پر هر اړخ اغېز کوي.
نوموړي زیاته کړې: «په عام ژوند، زدهکړو او کاري برخو کې د هغوی د بشپړې ونډې محدودول، د هغوی بنسټیز حقونه تر پښو لاندې کوي او لا هم د اقتصادي پراختیا، ثبات او له نړیوالې ټولنې سره د افغانستان بیا ادغام له خنډ سره مخ کوي.»
ګوتېرېش ویلي چې یو کال کېږي افغان ښځې د ملګرو ملتونو دفترونو ته له لاسرسي منع شوې او دا محدودیتونه له نړیوالو قوانینو، په ځانګړې توګه د ملګرو ملتونو له منشور سره په ټکر کې دي.
دا په داسې حال کې ده چې طالبانو په تېرو پنځو کالو کې پر ښځو او نجونو پراخ محدودیتونه لګولي دي.
