۸صبح، کابل: د روغتیا نړیوال سازمان (WHO) په افغانستان کې د بوتولیزم ناروغۍ د خپرېدو د مخنیوي، د دې ناروغۍ د ژر تشخیص او پر وخت درملنې لپاره په زیانمنو ټولنو کې عامه پوهاوی ورکوي.
دغه سازمان چهارشنبه د تلې پر ۸مه، ویلي چې په زیانمنو سیمو کې د څارنې د ملاتړ کوونکو ډلو له لارې یې د پوهاوي او ښوونیزو معلوماتو مواد وېشلي دي.
د روغتیا نړیوال سازمان زیاته کړې چې دغه ډلې خلکو ته د بوتولیزم د لومړنیو نښو د پېژندلو، د خوړو د خوندي چمتو کولو او ساتلو او د نښو د څرګندېدو په صورت کې روغتیايي مرکزونو ته د سمدستي ورتګ په اړه پوهاوی ورکوي.
دغه سازمان ټینګار کړی چې دا اقدامات کولای شي د ناروغۍ د سختو عوارضو په کمولو او د خلکو د ژوند په ژغورلو کې مرسته وکړي.
