د ملګرو ملتونو سرمنشي انتونیو ګوتېرېش د جګړو زیاتېدو ته په اشارې سره د جګړې د پراخېدو د مخنیوي او د ملکي وګړو د خوندیتوب غوښتنه کړې ده.
ګوتېرېش شنبه د اکټوبر پر ۲۴مه، ویلي چې د جګړو د پای ته رسولو او د بشري کړاوونو د کمولو لپاره باید خبرو اترو، ډیپلوماسۍ او سولې ته زمینه برابره شي.
هغه زیاته کړې چې د بشري کړاوونو د لا زیاتېدو د مخنیوي لپاره باید هغو جګړو ته د پای ټکی کېښودل شي چې ټولنې له یو بله بېلوي.
د ملګرو ملتونو سرمنشي ټینګار کړی چې د نابرابریو پر وړاندې مبارزه هم د ټولنو ترمنځ د واټن د زیاتېدو د مخنیوي او د سولې د ټینګښت لپاره اړینه ده.
ګوتېرېش دغه څرګندونې مصر ته له رسېدو سره هممهاله کړې دي.
