د ملګرو ملتونو سرمنشي انتونیو ګوتېرېش د اقلیمي بدلونونو د اغېزو زیاتوالي ته په اشارې، د سېلابونو، وچکالیو او د سمندرونو د اوبو د سطحې لوړېدو پر وړاندې د ټولنو د خوندیتوب غوښتنه کړې ده.
ګوتېرېش شنبه د نومبر پر ۱۴مه په اېکس پاڼه کې لیکلي چې د ځمکې د تودوخې په زیاتېدو، د اقلیمي بحران له اغېزو سره ځان برابرول حیاتي موضوع ګرځېدلې.
نوموړي ټینګار کړی چې د نړۍ ټول وګړي دې د وختي خبرداري تر پوښښ لاندې راشي، څو د اقلیمي بدلونونو له امله له رامنځته کېدونکو ګواښونو خوندي پاتې شي.
ګوتېرېش ویلي په هغو مواردو کې چې د اقلیمي بدلونونو له اغېزو سره ځان عیارول شونې نه وي، له زیانمنو خلکو سره د زیانونو د جبران په برخه کې دې مرسته چټکه او د لاسرسي وړ وي.
