د ملګرو ملتونو سرمنشي انتونیو ګوتېرېش د اقلیمي بحران په اړه د دوو ډولو بېعدالتۍ یادونه کړې او ویلي یې دي چې دا بحران هم د هېوادونو او هم د بېلابېلو نسلونو ترمنځ نابرابري رامنځته کوي.
ګوتېرېش یکشنبه د نومبر پر ۸مه پر خپله ایکس پاڼه لیکلي چې لومړۍ بېعدالتي د هېوادونو ترمنځ ده ځکه هغه هېوادونه چې د اقلیمي بحران په رامنځته کولو کې لږه ونډه لري، له پایلو یې ډېر زیان ویني.
نوموړي زیاته کړې چې دویمه بېعدالتي د نسلونو ترمنځ ده ځکه هغه ککړتیا چې نن تولیدېږي، دروند بار یې راتلونکو نسلونو ته پاتې کېږي.
د ملګرو ملتونو سرمنشي ویلي چې د دغه سازمان د اقلیمي بدلونونو په غونډه (COP31) کې د ګډون لپاره روان دی او د اقلیمي بحران د مخنیوي لپاره به د بېړنیو اقداماتو او هڅو غوښتنه وکړي.
