د ملګرو ملتونو سرمنشي د دغه سازمان له غړو هېوادونو غوښتي چې له کډوالو د ملاتړ او د پناهغوښتونکو کنوانسیون اصولو ته پر خپلې ژمنتیا ټینګ پاتې شي.
ګوتېرېش سهشنبه د جولای پر ۲۸مه پر اېکس لیکلي چې د پناهغوښتونکو کنوانسیون ۷۵ کاله مخکې د اړتیا په تر ټولو سختو شېبو کې له وګړو د خوندیتوب په موخه جوړ شوی دی.
نوموړي د ملګرو ملتونو له غړو هېوادونو غوښتي چې د کډوالو د کنوانسیون «متن او روح» ته پر خپلې ژمنتیا ولاړ پاتې شي او د پناهغوښتونکو د ملاتړ لپاره ډېرې هڅې وکړي.
ګوتېرېش ویلي: «په داسې حال کې چې د دغه کنوانسیون کلیزه نمانځل کېږي، باید د ناکامۍ د بیا تکرار خطر یې ونه منو. زه د ملګرو ملتونو له هر غړي هېواد څخه غواړم چې د کنوانسیون متن او روح ته خپله ژمنتیا تازه کړي.»
د ملګرو ملتونو سرمنشي ټینګار کړی چې له پناهغوښتونکو سره پیوستون او د هغوی له حقونو خوندیتوب د ټولو هېوادونو ګډ مسوولیت دی.
