۸صبح، کابل: د ملګرو ملتونو سرمنشي انتونیو ګوتېرېش ویلي چې طالبانو په افغانستان کې د ناڅرګندو لاملونو له کبله د خبریالانو نیولو او د رسنیو ځنډولو ته دوام ورکړی دی.
ګوتېرېش چهارشنبه د وږي پر ۲۵مه د افغانستان په اړه په خپل تازه راپور کې ویلي چې طالبانو یو وار درې خبریالان له ۱۹ ورځو تر درېیو میاشتو نیولي و او د دوو رسنیو خپرونې یې هم ځنډولې دي.
په دغه راپور کې راغلي چې یوې رسنۍ له یوې اوونۍ ځنډ وروسته بېرته خپلې خپرونې پیل کړې، خو بله رسنۍ لا هم ځنډول شوې پاتې ده.
د ملګرو ملتونو سرمنشي زیاته کړې چې د طالب چارواکو له خوا د خبریالانو نیول او د رسنیو ځنډول له څرګند لامل پرته ترسره شوې دي.
ګوتېرېش په افغانستان کې د رسنیو او خبریالانو د ازادۍ په اړه اندېښنه څرګنده کړې ده.
دا په داسې حال کې ده چې پر رسنیو او خبریالانو محدودیتونه پراخ شوي او اطلاعاتو ته لاسرسی هم له ننګونو سره مخ دی.
د خبریالانو نیول، د رسنیو ځنډول او اطلاعاتو ته پر لاسرسي محدودیت، په هېواد کې په خپلواکه توګه د اطلاع رسونې بهیر له خنډ سره مخ کړی دی.
