۸صبح، کابل: سیمهییزې سرچینې وايي چې د طالبانو مشر هبتالله اخوندزاده په کابل کې د یوه جومات چې د پنځو زرو لمونځ کوونکو ظرفیت لري او د یوې دیني مدرسې د بنسټ ډبره ایښې ده.
سرچینو چهارشنبه د لړم پر ۲۷مه ۸صبح ورځپاڼې ته وویل چې هبتالله اخوندزاده د طالبانو په دفاع وزارت کې له وینا وروسته د کابل حضوري چمن سیمې ته تللی او د دغو دیني مرکزونو د بنسټ ډبره یې ایښې ده.
د سرچینو په خبره، د طالبانو مشر په دې ناسته کې ویلي چې په کابل کې د یو لوی جومات او دیني مدرسې د بنسټ ډبرې له ایښودو مخکې کندهار ته نه ځي.
سرچینو زیاته کړې چې هبتالله اخوندزاده په کابل کې د جوماتونو پر کمښت نیوکه کړې او ویلې یې دي چې د کندهار پرتله په دغه ښار کې د سهار د لمانځه لپاره اذانونه کم اورېدل کېږي.
نوموړي کابل ښاروالۍ ته امر کړی چې په ښار کې ډېر جوماتونه جوړ کړي.
هغه ویلي چې د طالبانو د نظام بقا د جوماتونو او دیني مدرسو له پراخېدو سره تړلی دی.
د سرچینو په خبره، د طالبانو د دفاع وزارت په ناسته کې کلک امنیتي تدابیر نیول شوي او د اوو زونونو والیان، وزیران او ځينو دیني عالمانو په کې ګډون کړی دی.
سیمهییزې سرچینې وايي چې هبتالله اخوندزاده له دغو مراسمو وروسته په زرهي موټرو کې د کابل ښار پر ځينو واټونو ګرځېدلی دی.






