۸صبح، کابل: د ملګرو ملتونو سرمنشي انتونیو ګوتېرېش ویلي چې په افغانستان کې د ښځو او نجونو د حقونو نقض مخ پر زیاتېدو دی او هغوی له سختو محدودیتونو سره مخ دي.
ګوتېرېش سه شنبه د لړم پر ۵مه، د ملګرو ملتونو د امنیت شورا په غونډه کې ویلي چې نجونې له هغو زدهکړو محرومېږي چې ورته اړتیا لري او دا یې اساسي حق دی.
هغه په جګړهځپلو سیمو کې د تاوتریخوالي او تبعیض زیاتېدو ته په اشارې سره د سولې په مذاکراتو کې د ښځو پر ګډون ټینګار کړی دی.
ګوتېرېش زیاته کړې چې ښځینه مشرانې، سیاستوالې، خبریالانې او د بشري حقونو مدافعانې څنډې ته کېږي او په نښه کېږي.
د ملګرو ملتونو سرمنشي د ښځو په مشرۍ د فعالیت کوونکو سازمانونو د مالي ملاتړ د زیاتولو او د ښځو پر وړاندې د تاوتریخوالي د عاملانو د حسابورکونې غوښتنه کړې ده.
دا په داسې حال کې ده چې په ملګرو ملتونو کې د امریکا د استازي مرستيالې تمی بروس هم د ښځو او نجونو پر وړاندې د طالبانو محدودیتونه غندلي او د هغو د ژر تر ژره پای ته رسولو غوښتنه یې کړې ده.
هغې زیاته کړې چې طالبانو په تېرو پنځو کلونو کې د سولې او امنیت په برخه کې د افغان ښځو د څو لسیزو لاسته راوړنې له منځه وړې دي.
په افغانستان کې د طالبانو له بیا واکمنېدو وروسته، ښځې او نجونې د زدهکړو، لوړو زدهکړو او کار په برخو کې له پراخو محدودیتونو سره مخ شوې دي.
