۸صبح، کابل: د ملګرو ملتونو په سازمان کې د امریکا د استازي مرستيالې تمی بروس د ښځو او نجونو پر وړاندې د طالبانو محدودیتونه غندلي او د هغو د ژر تر ژره پای ته رسولو غوښتنه یې کړې ده.
بروس سه شنبه د لړم پر ۵مه، ویلي چې طالبانو په تېرو پنځو کلونو کې د سولې او امنیت په برخه کې د افغان ښځو د څو لسیزو لاسته راوړنې له منځه وړې دي.
هغې زدهکړو او کار ته د ښځو او نجونو د لاسرسي په برخه کې د طالبانو محدودیتونه د نه منلو وړ بللي او د هغو د ژر تر ژره لغوه کولو غوښتنه یې کړې ده.
بروس زیاته کړې چې امریکا د ښځو او نجونو د بشري حقونو دفاع او د هغوی د اقتصادي پیاوړتیا ته ژمنه ده.
د هغې په وینا، په دې ژمنتیا کې د ټولنیز ژوند، مدني، سیاسي او اقتصادي برخو په ټولو ډګرونو کې د ښځو او نجونو د ګډون ملاتړ شامل دی.
بروس همداراز ویلي چې امريکا د ښځو او نجونو پر وړاندې د تاوتریخوالي د مخنیوي او د هغوی د حقونو د دفاع له هڅو ملاتړ کوي.
د ملګرو ملتونو دې چارواکې ټینګار کړی چې امریکا د بشري مرستو په نظام کې تر ټولو لویه انفرادي مرسته کوونکې ده.
هغې زیاته کړې چې د جګړو او طبیعي پېښو پر مهال د ښځو او نجونو ملاتړ، په ځانګړې توګه د هغو کسانو چې د جنسي تاوتریخوالي قرباني شوي، ځانګړی اهمیت لري.
په ملګرو ملتونو کې د امریکا د استازي مرستيالې د دې سازمان له غړو هېوادونو هم غوښتي چې د ښځو او نجونو د حقونو د ملاتړ په برخه کې خپلې ژمنې په عملي اقداماتو بدلې کړي.
