۸صبح، دایکندي: په دایکندي کې ځايي سرچینې وايي چې طالبانو د سنګتخت او بندر ولسوالۍ له بازاره شاوخوا ۱۰ ښځې نیولې دي.
سرچینو چهارشنبه د لړم پر ۲۷مه ۸صبح ورځپاڼې ته ویلي چې دا ښځې د طالبانو د امنیې قوماندانۍ، استخباراتو او امر باالمعروف او نهی عن المنکر له خوا نیول شوې دي.
د سرچینو په خبره، په نیول شویو کې زدهکوونکې، ښځينه ښوونکې او هغه ښځې چې بازار ته د توکو اخیستلو لپاره راغلې وې، شاملې دي.
سرچینې زیاتوي چې ځينو نجونو غوښتل وتښتي او ځينو ځانونه اوبو ته اچولې دي.
د سرچینو په خبره، په نیول شویو کې څلور نجونې او څلور ښځې هم دي چې ځينې یې په ضمانت خوشې شوې او څلور نورې لا هم په توقیف کې دي.
سرچینې ټینګار کوي چې دا ښځې د برقع/چادرۍ نه لرلو له کبله نیول شوې دي.
دا په داسې حال کې ده چې په وروستیو میاشتو کې د ورته لامل له کبله ځينې ښځې نیول شوې چې له کبله یې اندېښنې راپارېدلې دي.






