۸صبح، هرات: د هرات سیمهییزې سرچینې وايي چې د طالبانو د امربالمعروف او نهی عنالمنکر وزارت سرپرست دغه ولایت ته د خپل سفر په ترڅ کې د دغې ډلې د امربالمعروف او نهی عنالمنکر د توشېح شوي قانون د پلي کېدو لپاره د خلکو د همکارۍ غوښتنه کړې ده.
سرچینو یکشنبه د لړم پر ۲۰مه، ۸صبح ورځپاڼې ته وویل چې حنفي دا غوښتنه په هغې غونډه کې چې د مولانا بلخي په تالار کې د دغه قانون د پلي کېدو په موخه جوړه شوې وه، مطرح کړې ده.
هغه ویلي چې خلک بايد د طالبانو د قوانينو په پلي کېدو کې له دغې ډلې سره همکاري وکړي.
نوموړي طالب چارواکي ادعا کړې چې د دغې ډلې قوانین له اسلامي شریعت څخه اخیستل شوي، خو یو شمېر بهرنۍ رسنۍ د دغه قانون پر ضد منفي تبلیغات کوي.
له دې مخکې هم طالبانو د خپلو قوانینو د پلي کېدو لپاره له خلکو د همکارۍ غوښتنه کړې وه.
طالبانو د جوماتونو له امامانو غوښتي وو چې خلکو ته د امربالمعروف او نهی عنالمنکر قانون په هکله توضیحات ورکړي.
د طالبانو دا قانون چې د ډېری هېوادوالو په ځانګړې توګه د ښځو اساسي حقونه په نښه کوي، د بشري حقونو فعالانو او یو شمېر نړیوالو بنسټونو له غبرګون سره مخ شوی دی.
