۸صبح، پنجشیر: د طالبانو د امر باالمعروف او نهی عنی المنکر وزارت سرپرست محمدخالد حنفي ادعا کړې چې نظام یې ټولګډونی دی.
حنفي دا څرګندونې نن پنجشنبه د غويي پر ۲۰مه په پنجشیر کې یوې ولسي غونډې ته کړې دي.
د نوموړي په خبره، دمګړۍ نږدې یو میلیون کسان د دغې ډلې تر کنټرول لاندې ملکي او نظامي بنسټونو کې کار کوي.
حنفي زیاته کړې چې «اسلامي نظام» د ټولګډونيوالي لپاره «مکلفیت نه لري.»
هغه ویلي چې «په افغانستان کې د منکراتو کچه صفر شوې او په نږدې درېیو کلونو کې ټولې کړنلارې او پالیسۍ د اسلامي فرامینو له مخې صادرې شوې دي.»
په تېرو درېیو کلونو کې طالبانو د یوه ټولګډوني حکومت جوړولو او د بشري حقونو ارزښتونو ته د درناوي په برخه کې د هېوادوالو، سیاسي مخالفانو او نړیوالې ټولنې غوښتنو ته منفي ځواب ورکړی دی.
څو ورځې وړاندې د اسلامي همکاریو سازمان سرمشریزې په افغانستان کې د یوه ټولګډوني حکومت پر اړتیا ټینګار کړی و؛ خو طالبانو په وار وار ویلي چې رژیم ټولګډونی دی.