۸صبح، پنجشیر: سیمه ییزې سرچینې وايي چې طالب جنګیالي د پنجشیر سیند په اوبو کې د کبانو د نیولو لپاره «لاسي بمونه او زهر» کاروي.
سرچینې د شنبې ورځ د تلې میاشتې په لومړۍ نېټه له ۸صبح ورځپاڼې سره د خبرو پر مهال تایید کړې، چې طالبان له څو ورځو راهیسې دا کار کوي.
د اوسيدونکو په حواله سرچينې خبرداری ورکوي، چې د طالبانو دغه کړنه به د پنجشېر په سیند کې د کبانو د نسل د له منځه تلو لامل شي.
طالبانو تر اوسه په دې اړه څه نه دي ویلي.
دا په داسې حال کې ده، چې تېر حکومت د پنجشېر په سیند کې د لاسي بمونو او زهري موادو په غورځولو سره د کبانو د نيولو پر طريقه بنديز لګولى و او ځايي اوسېدونکي په دې برخه کې له نورو لارو کار اخلي.
د تېر حکومت د شمېرو پر بنسټ، افغانستان په کال کې له ۳۶۰ زره ټنو څخه ډېرې د کب غوښې ته اړتیا لري، چې له دې ډلې یوازې ۱۱ زره ټنه یې تولیدوي.
