۸صبح، کابل: د مخکیني حکومت د بهرنیو چارو وزیر حنیف اتمر فدرالي نظام د افغانستان لپاره مناسب نه ګڼي او وایي، چې «په اوسني وضعیت کې فدرالیزم د ملوکالطوایفي د واکمنېدو زمینه برابروي.»
هغه له «اېبياېن» رسنۍ سره په مرکه کې، چې د دوشنبې پر ورځ خپره شوه ټینګار کړی، چې «افغانستان یوه واحد سیاسي نظام ته اړتیا لري.»
هغه ویلي، چې افغانانو فدرالي نظام د ۲۰۰۴ کال د لویې جرګي په اساسي قانون کې رد کړی او په اساسي قانون کې هم فدرالیزم نشته.
حنیف اتمر موده مخکې د «د سولې او عدالت ملي غورځنګ» سیاسي بهیر له یو شمېر سیاسي څېرو او د مخکیني حکومت له چارواکو سره، چې ډېری یې له هېواده بهر دي رامنځته کړی دی.
نوموړي د دغه سیاسي بهیر د اعلان پرمهال له طالبانو وغوښتل، چې د دوحې د تړون له مخې پر خپلو ژمنو ودرېږي او بینالافغاني خبرې اترې رامنځته کړي ترڅو «ټولګډونه سیاسي هوکړې» ته ورسېږي.
اتمر همداراز ټینګار کړی، چې له شته ناورین څخه د هېواد د ژغورلو لپاره د حللار «تر هر عنوان لاندې او د هر لوري له خوا د جګړې په دوام کې» نه ګڼي.
دا په داسې حال کې ده، چې ځینو سیاسي بهیرونه له دې جملې د مخکیني ولسمشر مرستیال سرور دانش، چې تازه یې یو ګوند رامنځته کړی د افغانستان لپاره د فدرالي نظام د جوړولو وړاندیز کړی دی.
«د افغانستان د ژغورلو لپاره د مقاومت عالي شورا» چې څو میاشتې مخکې د هېواد د یو شمېر سیاستوالو له خوا رامنځته شوه هم د نامتمرکز پارلماني جوړښت او د والیانو د انتخابيوالی وړاندیز کړی دی.
