۸صبح، کابل: د افغانستان لپاره د پاکستان ځانګړي استازي محمد صادق او د طالبانو د کورنیو چارو وزیر سراجالدین حقاني د دواړو هېوادونو ترمنځ د امنیتي او سیاسي ستونزو پر سملاسي حل ټینګار کړی دی.
د طالبانو د کورنیو چارو وزارت سهشنبه د مرغومې پر ۴مه د پاکستان ځانګړي استازي او سراجالدین حقاني له لیدنې خبر ورکړی دی.
یاد وزارت د سراجالدین حقاني په حواله ویلي چې د دواړو هېوادونو ترمنځ د امنیتي او سیاسي ستونزو هوارېدل باید چټک شي.
همداراز محمد صادق د دواړو هېوادونو ترمنځ د شته ستونزو پر سملاسي حل ټینګار کړی دی.
د طالبانو د کورنیو چارو وزارت په وینا، په دې لیدنه کې د دواړو هېوادونو ترمنځ د اړیکو پر پیاوړتیا هم ټینګار شوی دی.
له دې مخکې د افغانستان لپاره د پاکستان نوي ټاکل شوي ځانګړي استازي کابل ته د خپل سفر خبر ورکړی او زیاته کړې یې وه چې له طالب چارواکو سره به «رغنده» لیدنې ولري.
د یادونې ده چې په افغانستان کې د ټيټيپي جنګیالیو حضور د پاکستان جدي اندېښنه ګڼل کېږي.
دغهراز د طالبانو او پاکستان ترمنځ وروستیو سرحدي ناندریو هم د دواړو هېوادونو ترمنځ اختلافات ډېر کړي دي.
د یادونې ده چې په دې وروستیو کې د دوهاړخیزو اړیکو د ټینګښت لپاره د طالبانو او پاکستاني چارواکو ترمنځ لیدنې ډېرې شوې دي.
