۸صبح، کابل: د بشري حقونو په څار سازمان کې د ښځو برخې مسوولې هېدر بار د ښځو پر حقونو د محدودیتونو د پایلو او امیندوارۍ د خطرونو په اړه خبرداری ورکړی دی.
نوموړې دوشنبه د لړم پر ۱۱مه په اېکس پاڼه کې لیکلي چې د ماشومانو د ودونو زیاتوالی، له امیندوارۍ د مخنیوي او جنین له سقطه د ښځو محرومیت، په افغانستان کې اندېښمنونکي عوامل دي.
هغې د ښځو د اقتصادي خپلواکۍ کمزورتیا او د نرواکي نظام بېرته پیاوړتیا هم د دغو اندېښنو د زیاتېدو نور لاملونه بللې دي.
د بار په خبره، د جبري امیندوارۍ زیاتوالی هم وضعیت ډېر د اندېښنې وړ کړی دی.
نوموړې زیاته کړې چې دا بدلونونه په داسې حال کې رامنځته کېږي چې په افغانستان کې امیندواري ورځ تر بلې له ډېرو خطرونو سره مله ده.
پرون د افغانستان د تحلیلګرانو شبکې هم خبرداری ورکړی و چې په نوي پيغلتوب او پرلپسې امیندواري د میندو روغتیا له خطرونو سره مخ کوي، په ځانګړې توګه په داسې وضعیت کې چې په تېرو پنځو کالو کې روغتیايي خدماتو ته د میندو لاسرسی سخت شوی دی.
