۸صبح، کابل: په افغانستان کې د ملګرو ملتونو پراختیايي پروګرام (UNDP) وايي چې په هېواد کې د نري رنځ د ناروغانو د درملنې د بریا کچه ۹۵.۶ سلنې ته رسېدلې ده.
نوموړي بنسټ دوشنبه د لړم پر ۱۱مه په اېکس پاڼه کې لیکلي چې د روان میلادي کال په درېیمه ربع کې په افغانستان کې ۱۸۵ زره او ۶۲۹ کسان د نري رنځ د تشخیص لپاره ازمایل شوي دي.
د ملګرو ملتونو د شمېرو له مخې، په همدې موده کې ۱۳ زرو ۹۱۸ ناروغانو درملنه پیل کړې ده.
د ملګرو ملتونو د پراختیايي پروګرام دفتر زیاته کړې چې د درملنې د بریا کچه ۹۵.۶ سلنې ته رسېدلې چې له ټاکل شوي هدفه مخکې ده.
یاد بنسټ ویلي چې په ټول افغانستان کې د نري رنځ پر وړاندې مبارزه د ایډز، نري رنځ او ملاریا سره د مبارزې نړیوال صندوق په ملاتړ او د دغه بنسټ د پروګرامونو په پلي کولو روانه ده.
