حکمتیار د کرزي په کور کې له غني سره د خپلې هوکړې جزییات په ډاګه کړل

د حزب اسلامي مشر ګلبدین حکمتیار د حامد کرزي په کور کې د درې اړخیزې ناستې پرمهال له ولسمشر غني سره د خپلې هوکړې جزییات په ډاګه کړل.
د غیرایتلافي لنډمهاله انتقالي حکومت رامنځته کول، د طالبانو له مشرتابه سره د پټو لیدنو ترتیب، د جمهوري ریاست، پارلماني او محلي شوراګانو ټاکنې، د تصمیم نیونې مرجع جوړول، د ټولو پوځي او سیاسي بندیانو خوشې کول، له تور لېسته د نومونه ایستل او د دولت د عالي شورا جوړول هغه موارد دي، چې د حکمتیار په خبره په درې اړخیزه ناسته کې پرې هوکړه وشوه.
دغه ناسته د غویي میاشتې په یوویشتمه نېټه د حامد کرزي په کوربتوب او منځګړیتوب وشوه.
حکمتیار ویلي، چې په دغه ناسته کې په څو موضوعاتو خبرې وشوې. هغه د دې ناستې له موافقو خوښ دی او په خبره يې، په ډک لاس راستون شوی دی. د حزب اسلامي مشر ویلي، چې ولسمشر غني یې ټولې طرحې او تحلیلونه منلي دي.
د ښاغلي حکمتیار په خبره په دې درې اړخېزه ناسته کې هوکړه وشوه، چې د استانبول له ناستې به په هېواد کې د جګړې د پای ته رسېدو او د سولې رامنځته کولو برخه کې د یوه فرصت په توګه ګټه اخلي او ټولې خواوې به له یوې روښانه او واحدې طرحې سره ګډون کوي.
د حزب اسلامي مشر یادونه وکړه، چې ولسمشر غني د استانبول او دوحې ناستو په هکله منفي نظر درلود او کابل ته د مذاکراتو بهیر د لېږد غوښتنه یې کوله؛ خو بیا یې هوکړه وکړه چې له دغو ناستو به د یو ښه فرصت په توګه ګټه پورته شي.
هغه څه چې حکمتیار ویلي، لومړنۍ هوکړه د «یوه غیرایتلافي لنډمهاله انتقالي حکومت» جوړول دي. حکمتیار په دې هکله وویل، چې په دغه حکومت کې به د واک وېش د ګوندونو تر منځ نه؛ بلکې ټولمنلي وي او د ښې مخینې لرونکي وګړي به د حکومت اډانه جوړوي.
همداراز د حزب اسلامي مشر زیاته کړه، د ولسمشرۍ، ولسي جرګې او محلي شورا ټاکنو د ترسره کېدو په اړه هم هوکړه وشوه.
ګلبدین حکمتیار ویلي هوکړه وشوه، چې د انتقالي حکومت په سر کې د تصمیم نیونې د عالي شورا جوړول دي او غړي به یې د طالبانو په ګډون د اتو اغېزناکو خواوو مشران وي، چې د انتقالي حکومت کړنې وارزوي.
د ښاغلي حکمتیار په خبره د هوکړې څلورم مورد د ټولو سیاسي او پوځي بندیانو خوشې کول دي. نوموړي همداراز د ټولو هغو افغانانو نومونه چې په تور لیست کې راغلي، له غني سره د خپلې هوکړې پنځم مورد یاد کړ.
د حزب اسلامي مشر زیاته کړه، له ولسمشر غني سره یې هوکړه وکړه، چې د سولې تر موافقې وروسته به په هېواد کې سراسري او دایمي اوربند اعلانېږي.
حکمتیار وویل، په درې اړخیزه ناسته کې هوکړه وشوه، چې د نظام، اساسي قانون او نورو مواردو په هکله بحث باید تر ټاکنو وروسته وشي. هغه ټينګار وکړ، باصلاحیته لویه جرګه دې په دې هکله تصمیم ونیسي او د تصمیم نیونې وروستۍ مرجع لویه جرګه ده، چې غړي یې باید انتخابي وي.
حکمتیار همداراز وویل، د دغې طرحې د توحید په موخه د دولت عالي شورا پر جوړېدو هوکړه وشوه او غړي به یې د جګړې او سولې اغېزناکو اوه ګونو خواوو مشران وي. د نوموړي په خبره، دغه شورا به تر ټولو لوړه مرجع وي.
د حزب اسلامي مشر وویل، ولسمشر ژمنه وکړه، د دغې درې اړخیزې ناستې طرح به د دولت له لوړپوړو چارواکو سره شریکوي او په دې هکله به د هغوی موافقه اخلي. د نوموړي په خبره، د دغو توافقاتو د اجرا کولو په موخه ولسمشر ته د مهال وېش وړاندیز هم شوی دی.
هغه ویلي، هوکړه شوې وه، چې د کوچني اختر د ورځو په ګډون اتو ورځو کې دغه هوکړه عملي کېږي؛ خو نوموړي وویل، چې ښاغلی غني په حکومت کې دننه د ځينو چارواکو له فشار سره مخ شو او هغوی له دې هوکړې سره مخالفت ښودلی و.
د ګلبدین حکمتیار په وینا په دغه ناسته کې هوکړه وشوه، چې دوه یا درې کسیز پلاوی به له طالبانو سره پټه ناسته کوي، که هغوی سولې ته ژمن وي، د استانبول ناستې ته به له یوې واحدې طرح سره ځي. هغه ویلي، چې دغه پلاوی به د طالبانو له مشرانو سره په سري توګه لیدنه کوي او واحده طرح به هغوی ته وړاندې کوي؛ چې روښانه شي طالبان سوله غواړي که جګړه.
د حزب اسلامي مشر ویلي، که د طالبانو ځواب مثبت و، د دولت د لوړپوړو چارواکو په ګډون سیاسي مشران به د استانبول په ناسته کې ګډون کوي او وروستۍ طرح به ورسره شریکوي؛ ترڅو یوې هوکړې ته ورسېږي.
نوموړي ټينګار وکړ، که طالبانو منفي ځواب ورکړ او سوله یې نه غوښته، په دې هکله به د دولت عالي شورا پرېکړه کوي.
حکمتیار زیاتوي چې د حامدکرزي په کور کې د درې اړخیزې ناستې د هوکړې اساسي ټکي همدا وو، خو ولسمشر په خپل ټیم کې له ستونزې سره مخامخ شوی دی. که څه هم هغه ووېل چې محمد اشرف غني ژمنه کړې وه چې یوازې موافقې ابلاغ او وروسته یې اجرا کړي.
ګلبدین حکمتیار وویل، چې د دولت عالي شورا کې ګډون نه کوي، خو حکومت ته دوې نورې لارې وړاندې کوي. د نوموړي په خبره، دولت دې د خپلو متحدو غړو له ډلې د تصمیم نیونې عالي شورا ځان ته جوړه کړي.
د هغه په خبره دویم وړاندیز یې د دولت له درییو خواوو او متحدینو، له دولته بهر (اپوزیسیون) په ګډون د تصمیم نیونې مرجع جوړه شي او د لویو ملي مسایلو په هکله دې پرېکړې کوي.
د ښاغلي حکمتیار په خبره، هغه نور مسایل چې د کرزي په کور کې پرې پرېکړه وشوه لکه د سولې طرحه، د استانبول په ناسته کې ګډ دریځ او له طالبانو سره خبرې اترې باید عملي شي.
حکمتیار خبرداری ورکړ، که ژمنې او هوکړې عملي نه شي، هغه به مجبور شي چې د سولې او روان وضعیت په اړه په خپلواکه توګه پرېکړه وکړي.
د حزب اسلامي مشر په دغه ناسته کې زیاته کړه چې د سولې بهیر له بندون سره مخامخ شوی او دواړه خواوې پر جګړې ټينګار کوي. حکمتیار ویلي، چې ټول لوري باید سولې ته ژمن شي او په دې برخه کې هڅه وکړي.