۸صبح، هرات: د هرات سیمهییزې سرچينې وايي چې د هرات-تورغونډۍ لويه لار د تګراتګ پر مخ تړل شوې ده.
د سرچینو په وینا، دا لار یکشنبه د لیندۍ پر ۲۵مه، سهار مهال د ډېرې واورې ورښت او او یخبندان له کبله د رباط سنګي ولسوالۍ په «بند بقرچر» سیمه کې د تګراتګ پر مخ تړل شوې ده.
بل خوا په هرات کې ځايي طالبانو د کشک رباط سنګي، کشک کهنه، ګلران او تورغونډۍ ولسوالیو له اوسېدونکو غوښتي چې د واورې ورښت له کبله پر دې لویه لار له تګراتګ ډډه وکړي.
په هرات کې له تېرې شپې راهیسې شدیده واوره ورېږي چې له کبله یې په دغه ولایت کې هوا ډېره سړه شوې ده.
تېره ورځ د طالبانو د ترانسپورت او هوايي چلن وزارت د هواپېژندنې ادارې د هېواد په ۱۱ ولایتونو کې د شدیدې واورې، باران، سېلاب او ورښت پېښېدو خبرداری ورکړی و.
