۸صبح، کابل: د طالبانو د ټولګټو وزارت خبر ورکړی چې د سالنګ لویه لار د تګراتګ پرمخ پرانیستل شوې ده.
د نوموړي وزارت ویاند اشرف حقشناس ویلي چې د سالنګ دوشنبه د مرغومې پر ۱۷مه د سهار له ۷:۰۰ بجو راهیسې د چټکمزلو او مسافروړونکو موټرو پر مخ پرانیستل شوې ده.
حقشناس ویلي چې د دغې لارې په بېلابېلو برخو کې د کنګل کېدو د مخنيوي په موخه د «ریګو او مالګې شیندلو» چارې روانې دي.
ده له هېوادوالو غوښتي چې پر د سالنګ پر لارې د تګراتګ پرمهال ژمني وسايل او تجهیزات له ځان سره ولري.
دا لار له تېرې جمعې ورځې راهیسې د واورې ډېر ورښت له امله بند شوی و.
سالنګ د هېواد یوه مهمه ترانزیتي لار ده چې د ژمي موسم پرمهال د ډېرو واورو او توپانونو له امله وخت ناوخت د تګراتګ پر مخ تړل کېږي.
د یادونې ده چې له تېرو څو ورځو راهیسې د هېواد په ګڼو ولایتونو کې د واورې شدید ورښت له امله ګڼې لویې لارې د ترافیکو پرمخ تړل شوې دي.
