حشمت الله شهيدي د کرکټ ملي لوبډلو د پنځوس اوريزو او ټېسټ لوبو لوبډلمشر شو

د افغانستان کرکټ ملي لوبډلو لپاره نوی لوبډلمشر وټاکل شو.

کرکټ بورډ اعلان وکړ چې د ياد بورډ د غړو ګډې پرېکړې له مخې اصغر افغان د ملي لوبډلې له لوبډلمشرۍ ګوښه او پرځای یې د نړيوالو یو ورځنیو او ټېسټ لوبو لپاره ځوان لوبغاړی حشمت الله شهیدي د لوبډلمشر او رحمت شاه زرمتی د مرستیال لوبډلمشر په توګه غوره شول.

د افغانستان کرکټ بورډ لخوا په خپرې شوې خبرپاڼه کې راغلي چې همدارنګه د شل اوریزو نړيوالو لوبو لپاره به ډېر ژر نوی لوبډلمشر معرفي شي او راشد خان به په یاد فارمټ کې د مرستیال لوبډلمشر په توګه په خپل ځای پاتې وي.

د کرکټ بورډ په وينا، د افغانستان او زمبابوې ترمنځ د لومړۍ ټېسټ لوبې په اړه چې د افغانستان کرکټ بورډ تحقیقاتي کمیټې کومې څېړنې ترسره کړې، د هغې له مخې دا جوته شوه چې د یادو سیالیو په لړ کې د افغان کرکټ ملي لوبډلې پخوانی لوبډلمشر اصغر افغان ځینې پرېکړې د دې لامل شوې چې افغان ملي لوبډله لومړۍ ټېسټ لوبه وبايلي.

د کرکټ بورډ دغه پرېکړه د کرکټ پوهانو او شنونکو لخوا ستايل شوې او دغه ګام يې د کرکټ ملي لوبډلو د ودې او پرمختګ لپاره اغېزناک ګڼلی دی.