۸صبح، کابل: د طالبانو مشر هبتالله اخوندزاده د دې ډلې له مخالفانو او له هېواده بهر مېشتو افغانانو غوښتي چې افغانستان ته راستانه شي. هغه ویلي چې طالبان به د خلکو د وړتیا او استعداد له مخې هغوی ته مسوولیتونه او مقامونه وسپاري.
د طالبانو تر کنټرول لاندې باختر خبري اژانس د سه شنبه د لړم پر ۲۶مه، راپور ورکړی چې هبتالله دا څرګندونې په کابل پوهنتون کې په یوه «علمي ـ څېړنیز کنفرانس» کې کړې دي. هغه د دې ډلې له مخالفانو غوښتي چې له هغو کړنو ډډه وکړي چې د ده په وینا، د نویو «فتنو» د رامنځته کېدو لامل کېږي.
هغه ویلي چې طالبان د خلکو د تېرو کړنو له مخې له هغوی سره حساب نه کوي او مخالفان کولای شي هېواد ته په راستنېدو سره د دې ډلې په جوړښت کې مسوولیتونه پر غاړه واخلي.
د طالبانو مشر زیاته کړې چې په افغانستان کې د ژبې، سیمې او قوم له مخې امتیاز نه ورکول کېږي او د خلکو حقونه د اصولو له مخې ټاکل کېږي.
هبتالله همداراز ویلي چې ټول هېوادوال کولای شي، له توپیر او تبعیض پرته، په افغانستان کې په خوندي توګه ژوند وکړي.
دا څرګندونې په داسې حال کې کېږي چې یو شمېر هېوادوالو او د تېر حکومت چارواکو د طالبانو له وېرې افغانستان پرېښی دی.
همداراز، داسې راپورونه خپاره شوي چې د تېر حکومت نظامیان هېواد ته تر راستنېدو وروسته له تبعیض، نیولو او شکنجې سره مخ شوي دي.






