۸صبح، کابل: د طالبانو مشر هبتالله اخوندزاده په کابل پوهنتون کې ویلي چې د مسلمانانو د ساتنې لپاره یې د خپل سر د قربانولو ژمنه کړې او د خپلې «واکمنۍ» د ساتلو لپاره به مسلمانان قرباني نه کړي.
د طالبانو تر کنټرول لاندې رسنیو د سه شنبه د لړم پر ۲۶مه، راپور ورکړی چې هبتالله دا څرګندونې په کابل پوهنتون کې په یوه «علمي ـ څېړنیز کنفرانس» کې کړې دي. دغه کنفرانس د هغه د فرمانونو د اغېزو ارزونې ته ځانګړی شوی و.
د طالبانو مشر زیاته کړې چې د خپل مقام او «واکمنۍ» د ساتلو لپاره جګړه نه کوي او د خپلې واکمنۍ د دوام په پار به هم مسلمانان قرباني نه کړي.
هغه دیني عالمانو ته په خطاب کې ویلي چې د مسلمانانو ساتنه د دوی مسوولیت دی او که عالمان له یو بل سره متحد شي، هېڅوک به د هغوی پر وړاندې د درېدو توان ونه لري.
هبتالله همداراز ټینګار کړی چې د هغه له امر پرته د قصاص حکم نه عملي کېږي او د طالبانو له ادارې پرته یې د شریعت پلي کول ناشوني بللي دي.
دا څرګندونې په داسې حال کې کېږي چې د طالبانو مشر په افغانستان کې د دې ډلې له واکمنېدو وروسته، د ګڼو فرمانونو په صادرولو سره د هېوادوالو، په ځانګړي ډول د ښځو او نجونو پر ژوند پراخ محدودیتونه لګولي دي.






