په کندهار کې د پوهنتون محصلين د لیلیې له نشتوالي شکايت کوي او وايي، دا تشه د دې لامل شوې چې دوی د خپلو زدهکړو پرېښودو ته اړ شي. د عبدالولي په نوم د ميدان وردګ ولايت يو محصل چې تېر کال د کندهار ولايت پوهنتون ته بریالی شوی، وايي چې په دې هیله يې دغه پوهنتون د زدهکړو لپاره انتخاب کړی چې لیلیه لري؛ خو په وينا يې دلته ليله نشته او د درې زره افغانیو په بدل کې د ښار په یو کرایه شوې کوټې کې اوسېږي.
نوموړی وايي، د ده نور ملګري چې د لګښتونو پوره کولو وس نه لري او له زدهکړو بېرته کورته ستانه شوي دي. هغه د ۸صبح ورځپاڼې له سیمهییز خبریال سره په خبرو کې وویل: «موږ فکر کاوه چې دلته ليله شته؛ خو کله چې راغلو ليله نه وه اوس مو په بازار کې کوټې نيولي چې تر له درې زرو نیولې تر څلور-پنځه زره افغانۍ د کرایې لګښت راځي. زموږ دومره وس نه کېږي، لګښتونه مو زيات دي. ډېر محصلين په تمه دي چې تبديلۍ واخلي ځکه دومره لګښتونه دلته نه شي پوره کولای، کار مونږ نه شو کولای او که کار وکړو، نو زدهکړې رانه پاتې دي، بل کارونه هم نه پیدا کېږي، کنې د زدهکړو ترڅنګ د لګښتونو پوره کولو لپاره کار ته هم چمتو یو»
د کندهار پوهنتون يو شمېر نور محصلين هم د لیلیې له نشتوالي شکايتونه کوي او په خبره، که د دوی لپاره د اوسېدو ځای برابر نه شي بېرته به کورونو ته ستانه شي او د زدهکړو بهیر به پرېږدي. امينالله د زابل ولايت اوسېدونکي او د کندهار پوهنتون محصل دی چې په لوړو نمرو نوموړي پوهنتون ته بریالی شوی او له تېرو دوو کلونو راهیسې په دغه پوهنتون کې د ژورنالیزم په پوهنځي کې لوړې زدهکړې کوي.
هغه وايي، دوی د کندهار په ښار کې د اوسېدو لپاره کوټې نيولي او زيات لګښتونه ترې کېږي. نوموړی وايي، د کندهار پوهنتون ته نږدې د روپیو په بدل کې هم د اوسيدو ځايونه نشته او دوی څو کيلومټره لېرې له پوهنتونه په شخصې ځايونو کې اوسېږي. نوموړی وايي، هره مياشت تر ۷۰۰ افغانۍ د لارې پر کرايه نقله وسایطو ته ورکوي.
دی زیاتوي: «موږ په ښار کې اوسېږو، پوهنتون ډېر زيات رانه لېرې دی، ډېرو په ستونزو کې يو، موږ چې حساب ورته کړی، هره ورځ چې تر پوهنتون پورې په رکشه يا ټيکسي کې ځو د میاشتي پر موږ ۷۰۰ افغانۍ د لارې کرايه راځي، دلته مو په درې زره افغانۍ کوټه په کرايه نیولې ده. يو محصل کله دومره لګښتونه پورته کولای شي.»
د هلمند ولايت يو اوسيدونکی چې د کندهار دولتي پوهنتون کمپیوټر ساينس پوهنځي ته کامياب شوی؛ خو د اقتصادي ستونزو له کبله يې پوهنتون پرېښې، ۸صبح ته وويل چې تېر کال د کندهار دولتي پوهنتون ته کامياب شو، خو په خبره یې، تر هغه وروسته يې د پوهنتون زدهکړې پرېښودې چې د ليلیې له نشتوالي خبر شول. دی وايي، په شخصي توګه دومره وس نه لري چې د پوهنتون لوستلو لپاره دې ټول لګښتونه پر غاړه واخلي. د هغه په خبره، اقتصادي ستونزو اړ کړی چې زدهکړې پرېږدي او پر کور پاتې شي.
دی وايي: «تېر کال کامياب شوم، خو وروسته چې مو معلومات واخیستل او راته وويل شول چې دا پوهنتون ليليه نه لري، حساب مې ورته وکړ ډېر لګښت راباندې راتلو، زه اړه شوم چې زدهکړې پرېږدم او خپلې ورځ مزدورۍ ته دوام ورکړم، ځکه د ګټې وټې څوک نه لرم او چې پوهنتون کې لیلیه هم ونه لرې، نو لګښتونه به له کومه کېږي؟»
د کندهار د دولتي پوهنتون طالب مسوولان وايي، د دغه پوهنتون د محصلينو لپاره د لیلیې چارې روانې دي او هيلې شته چې ژر بشپړې شي. د دغه پوهنتون د مسوولانو په وینا، دا مهال ۸۰۰ محصلين د کندهار پوهنتون په لیلیه کې اوسېږي. د کندهار پوهنتون چې د هېواد په کچه له مهمو پوهنتونونو شمېر کېږي، دا مهال یې بېلابېلو پوهنځیو کې شاوخوا پنځه زره محصلین پر زدهکړو بوخت دي چې اویا سلنه یې د نورو ولایتونو اوسېدونکي دي.
په کندهار کې پر داسي مهال محصلين د لیلیې له نشتوالي شکايتونه کوي چې په تېرو دوو کلونو کې په افغانستان کې په خاص ډول په سوېلي ولايتونو کې د کانکور په ازموينو کې د ګډوالو شمېر د پام وړ کم شوی او سږکال څه باندې ۱۸۰۰ کسانو په دغه ولایت کې په داسې حال کې د کانکور په ازموينه کې ګډون کړی چې نورو نور کلونه په کندهار کې د کانکور په ازموينه کې د ګډون کوونکو کسانو شمېر تر ۶ زرو پورې رسېده.
