هلمند کې د شاتو تولیدات مخ په زیاتېدو دي

د هلمند ولايت د کرنې ریاست چارواکي وایي، چې د شاتو مچیو روزنې صنعت د پراخېدو او د مالدارۍ سکتور د پیاوړتیا په موخه یې د شاتو مچیو روزونکو سره په ګډه هڅې پیل کړي، څو دې ولایت کې د شاتو مچیو روزنې صنعت ته وده ورکړي.
ددې رياست د مسؤلينو په وينا د همدې هڅو په پایله کې هلمند کې د شاتو د توليداتو کچه څه باندې ۳۵ ټنو ته رسېدلې ده.
د هلمند د کرنې رياست چارواکو په وينا تېر کال ددې ولایت د شاتو د تولید کچه ۲۴.۵ ټنه وه، چې سږکال به دا شمېره ۳۵.۷ ټنو ته لوړه شي.
د کرنې وزارت د معلوماتو له مخې د هلمند د کرنې ریاست لخوا بزګرانو ته تر دې دمه نږدې ۴۰۰ د شاتو مچیو فارمونه جوړ شوي او په دې سره په ياد ولايت کې د شاتو تولیدات مخ په زیاتېدو دي.
د کرنې وزارت لخوا په خپرې شوې خبرپاڼه کې راغلي چې اوسمهال د هلمند ولایت فارمونو کې ۱۳ زره او ۱۲۰ صندوقه مچۍ تر روزنې او پالنې لاندې دي.
په ورته وخت کې د هلمند ولایت د شاتو مچیو فارم لرونکي هم وایي چې، د شاتو توليدات يې د پخوا په پرتله ډېر شوي او سږکال هم د تېر کال په پرتله په کې د پام وړ زیاتوالی راغلی دی.
د هلمند ولایت د کرنې ریاست د معلوماتو له مخې په دې ولايت کې تېر ۱۳۹۹ لمريز کال ۲۴.۵ ټنه شات تولید شوي ؤ او په روان ۱۴۰۰ لمريز کال کې به ددې ولایت د شاتو د تولید کچه ۳۵.۷ مټریک ټنو ته ورسېږي.
د کرنې وزارت وايي چې سږکال د هلمند ولایت کرنې ریاست له لغمان ولایت څخه ۲۵ زره د بېرو نیالګي ياد ولايت ته لېږدولي او تر روزنې لاندې يې نیولي دي. ياد وزارت زياتوي چې، د دغو نیالګيو ګل د مچیو لپاره غوره خواړه بلل کېږي، چې له مخې به یې راتلونکي کې د بېرې شات هم دې ولایت کې تولید شي .
د افغانستان د کرنې وزارت په دې وروستیو کې په هېواد کې د شاتو د تولیداتو د زیاتوالي خبره کوي.
د راپورونو له مخې اوسمهال په ټول هېواد کې د شاتو مچیو ۶ زره ۷۵۷ فارمونه شته او په تېر لمریز کال کې په کابل او ولایتونو کې ۲ زره ۴۹۰ ټنه شات تولید شوي ؤ.