۸صبح، کابل: د بشري حقونو فعالانو، حقوقي کارپوهانو او د افغان ښځو د حقونو مدافعانو له کاناډا غوښتي چې په نړیوالو قوانینو کې د بشریت ضد د جنایت په توګه د «جنسیتي اپارتاید» له رسمیت پېژندلو ملاتړ وکړي.
د جنسیتي اپارتاید پر ضد د مبارزې (NEGA) شبکې شنبه د اګست پر ۸مه په یوې اعلامیې کې ویلي چې پر افغانستان د طالبانو د بیا واکمنېدو د پنځمې کلیزې په مناسبت به پنجشنبه د اګست پر ۱۳مه د کاناډا د اوتاوا ښار په کارلتون پوهنتون کې یوه غونډه جوړه کړي.
د دغې اعلامیې له مخې، دا ناسته به «له اعلامیې تر اقدامه: د بشریت پر ضد د جنایت په توګه د جنسیتي اپارتاید د رسمیت پېژندلو د مخته وړلو» تر سرلیک لاندې جوړه شي.
دا پروګرام به په کاناډا کې د «جنسیتي اپارتاید په اړه د کارپوهانو اعلامیې» رسمي او حضوري پیل وي.
په اعلامیې کې له هېوادونو غوښتل شوي چې «جنسیتي اپارتاید» د بشریت پر ضد د جنایت په توګه په رسمیت وپېژني او دا د بشريت پر ضد جنایاتو په وړاندیز شوي کنوانسیون کې ځای پر ځای کړي.
دا اعلامیه د نړیوالو حقوقو د کارپوهانو او د ښځو حقونو د مدافعانو ترمنځ له اتلس میاشتنۍ همکارۍ وروسته چمتو شوې ده.
دا ناسته داسې مهال جوړېږي چې د بشریت پر وړاندې د جرمونو کنوانسیون د مسودې په اړه د ملګرو ملتونو خبرې دوام لري.
سمبالونکي وايي، سره له دې چې فعالانو له هېوادونو غوښتي چې په دغه کنوانسیون کې د «جنسیتي اپارتاید» د شاملولو ملاتړ وکړي، کاناډا د نظرونو د وړاندې کولو په لومړي پړاو کې چې د ۲۰۲۶ کال په اپرېل کې ترسره شو، له دغه وړاندیزه ملاتړ نه دی کړی.
سمبالونکو له کاناډا غوښتي چې د دغه کنوانسیون په اړه د ملګرو ملتونو په راتلونکي پړاو خبرو کې د جنسیتي اپارتاید له ځای پر ځای کولو ملاتړ وکړي.
