د بشري حقونو کمېسیون: په مې میاشت کې ۲۸۰ ملکي وګړي وژل شوي دي

د بشري حقونو خپلواک کمېسیون ویلي، چې د روان کال په مې میاشت کې د تاوتریخوالي له کبله په هېواد کې د ۱۰۹ ماشومانو په ګډون ۲۸۰ تنه ملکي وګړي وژل شوي دي.
د بشري حقونو د خپلواک کمېسیون ویاند ذبیح الله فرهنګ، د غبرګولي په ۱۲مه نېټه، ۸صبح ته وویل چې په مې میاشت کې د تاوتریخوالي له امله ۶۳۴ ملکي وګړي ټپیان شوي دي. نوموړي زیاته کړې ښايي د تلفاتو کچه له دې نه هم لوړه وي.
د بشري حقونو د کمېسیون ویاند زیاته کړې چې د افغانستان د جګړې دواړه لوري نړیوالو بشري حقونو ته پام نه کوي او د پوځي او ملکي وګړو ترمنځ په توپیر کې پاتې راغلي نو بایده دي چې اوربند ټینګ شي، ځکه اوربند د افغانانو یوازینۍ غوښتنه ده.
د بشري حقونو د کمېسیون ویاند، له نړیوالې ټولنې غوښتي، چې د وګړو له بشري حقونو د ملاتړ او په افغانستان کې د تاوتریخوالي د ختمولو لپاره خپل حقوقي او اخلاقي مسوولیت ادا کړي.
د بشري حقونو کمېسیون ټینګار کوي، چې له دې وروسته باید په افغانستان کې بشري حقونه تر پښو لاندې نه شي.
په تېره میلادي میاشت کې په څو ولایتونو کې د امینتي ځواکونو او طالبانو ترمنځ سختې نښتې شوې دي.
د دې ترڅنګ د کابل په لوېدیځ کې د سیدالشهدا پر ښوونځي په برید کې له سلو زیاتو ملکي وګړو ته مرګ ژوبله اوښتې وه.