۸صبح، کابل: روسیې خواشینې ښودلې چې د افغانستان په اړه د «مسکو فارمټ» له اتمې ناستې وروسته د طالبانو او پاکستان ترمنځ د اختلاف له کبله ګډه بیانیه تصویب نه شوه.
ټاس خبري اژانس دوشنبه د تلې پر ۱۳مه راپور ورکړی چې د افغانستان لپاره د روسیې د ولسمشر ځانګړي استازي ضمیر کابلوف ویلي چې د طالبانو پلاوی باوري و چې د سږکال اعلامیې په مسوده کې د افغانستان په اړه د ترهګرۍ ډېره یادونه شوې ده.
نوموړي زیاته کړې چې روسیه له دغه دریځه حیرانه شوې، ځکه د هغه په خبره، ورته عبارتونه او اصطلاحات د تېر کال په اعلامیې کې هم کارول شوي و.
د روسیې ځانګړي استازي ویلي چې طالب چارواکي باور لري چې د دواړو هېوادونو اړیکې د تېر کال پرتله بدلې شوې او له همدې امله د سږ کال متن ورته د منلو نه و.
کابلوف ټینګار کړی چې «مسکو فارمټ» له ګډې اعلامیې پرته هم خپلو فعالیتونو ته دوام ورکولی شي، خو د داسې اعلامیې خپرول د ناستې له دود سره ډېر سمون لري.
«مسکو فارمټ» په ۲۰۱۷ کال کې د روسیې، افغانستان، هند، ایران، چین او پاکستان د ځانګړو استازو ترمنځ د مشورتي میکانیزم پر بنسټ رامنځته شو.
د دغه فارمټ لومړۍ ناسته د ۲۰۱۷ کال د اپریل پر ۱۴مه د افغانستان په ګډون د ۱۱ هېوادونو د مرستیال وزیرانو او ځانګړو استازو په حضور جوړه شوې وه.
