۸صبح، کابل: د بشري حقونو څار بنسټ وايي چې امریکايي او ایتلافي هېوادونو په افغانستان کې د جګړې له پیله ۲۵ کاله وروسته په دغه هېواد کې د جنګي جنایتونو او له بشري حقونو د جدي سرغړونو په تړاو عدالت او د زیانونو جبران نه دی برابر کړی.
نوموړي بنسټ دوشنبه د تلې پر ۱۳مه راپور ورکړی چې د سپټمبر د ۱۱مې له بریدونو وروسته، د امریکا حکومت له شکمنو د ځینو پوښتنو او پلټنو داسې لارو ته اجازه ورکړه چې له شکنجې سره برابرې وې.
د بشري حقونو څار سازمان ویلي چې په افغانستان کې امریکايي ځواکونو پر شکنجې او ناوړه چلند لکه وهل ټکولو، سپکاوي، مصنوعي ډوبولو، د اوږدې مودې لپاره له خوبه محرومولو او جعلي اعدامولو په څېر کړنو باندې لاس پورې کړی دی.
د دغه بنسټ په خبره، ګڼ نیول شوي ملکي وګړي له میاشتو یا کلونو وروسته، بې له دې چې پر کوم جرم تورن شي، خوشې شوې دي.
د بشري حقونو څار سازمان زیاته کړې چې تر اوسه د امریکا حکومت د دغو مواردو په اړه حساب ورکول یا بشپړ غرامت نه دی ورکړی.
د بشري حقونو په څار سازمان کې د اسیا څانګې مرستیالې پاتریشیا ګاسمن ویلي: «د امریکا حکومتونو جدي سرغړونې پټې کړې او هغو کسانو چې ډېر زیان یې لیدلی، نه یې غرامت ترلاسه کړی او نه عدالت.»
نوموړې زیاته کړې، هغه افغانان چې د امریکايي ځواکونو په بند کې شکنجه او د هغو کسانو کورنۍ چې په ناحقه وژل شوې، لا هم د امریکا له حکومته د غرامت د ترلاسي روښانه لار نه لري.
