۸صبح، کابل: پر بشري حقونو د څار بنسټ د جرمونو له نړیوالې محکمې غوښتي، چې د طالبانو تر ولکې لاندې افغانستان کې د جنایتونو په اړه پرېکړه وکړي.
پر بشري حقونو د څار بنسټ دوشنبه د وږي پر ۲۱ د یوه راپور په خپرولو د لاهې جرمونو له نړیوالې محکمې غوښتي، چې افغانستان کې د وروستیو بشري حقونو په تړاو اقدام وکړي.
پر بشري حقونو د څار بنسټ وایي، چې دغه څېړنې په افغانستان کې د طالبانو د بشري حقونو جنایتونه په ډاګه کولای شي.
دا په داسې حال کې ده، چې د لاهې محکمې څارنوال کریم خان د ۲۰۲۲ د اګسټ پر ۲۶ افغانستان کې د بشري حقونو د جنایتونو په اړه د څېړنو د بیا پيل غوښتنه وکړه.
کریم خان په افغانستان کې د عدالت د تامین لپاره د دغې محکمې قضاوت اړین بللی او ویې ویل، چې په افغانستان کې د طالبانو واکمني به هېڅکله عدالت په پام کې ونه نیسي.
د هغه په وینا، دغه څېړنې به د داعش او طالبانو پر جنایتونو متمرکزې وي او هغو جنایتونو ته به لومړیتوب ورکړل شي، چې د افغانستان د امنیتي ځواکونو او امریکایانو پر ضد ترسره شوي دي.
د ویلو ده، چې د راپورونو له مخې د طالبانو تر ولکې لاندې افغانستان کې له بشري حقونو پراخه سرغړونه او ډول ډول جنایتونه روان دي او داسې نه برېښي، چې ژر دې ودرېږي.
