۸صبح، کابل: د بشري حقونو څار بنسټ وايي چې د طالبانو د مشرتابه له خوا د سختو تګلارو له پلي کولو سربېره یې چارواکي د فرمانونو په پلي کولو کې یو لاس نه دي او ترمنځ یې اختلاف شته.
د بشري حقونو په څار بنسټ کې د افغانستان چارو څېړونکې فرشتې عباسي پنجشنبه د تلې پر ۹مه ویلي چې د نجونو پر زدهکړو د بندیز په ګډون پر ځينو تګلارو د طالب چارواکو ترمنځ د نظر اختلاف شته او په ځينو ولایتونو کې د محدودیتونو د پلي کېدو کچه بېله ده.
نوموړې زیاته کړې چې ځينې جګپوړې څېرې په ښکاره د نجونو پر زدهکړو له بندیز سره مخالفت کړی، په داسې حال کې چې په کندهار کې د طالبانو مشرتابه په دې برخه کې سخت دریځ لري.
د عباسي په خبره، بشردوستانه بنسټونه هم په ځينو ولایتونو کې کولی شي له سیمهییزو چارواکو سره بېلابېلو سیمو ته د لاسرسي او د ښځو پر ګومارنې خبرې وکړي.
هغې ویلي چې د نظرونو دا توپیر د طالبانو د منځلاریتوب مانا نه لري، خو ښيي چې سیمهییزو چارواکي د فرمانونو د پلي کولو او تفسیر څرنګوالي په اړه خپله پرېکړه وي.
دا مطلب چې د بشري حقونو په څار سازمان کې د افغانستان د چارو څېړونکې فرشتې عباسي او د دغه بنسټ د اسیا څانګې د جګپوړې مدیرې پاتریشیا ګاسمن له خوا چمتو شوی، ښيي چې افغانستان لا هم د بشري حقونو له جدي بحران سره مخ دی.
