«بريالی کېدای شم» چاپېدل

دغه کتاب د ښاغلي محمد نعیم عطارد لخوا د هېواد په دواړو رسمي ژبو (پښتو او دري) لیکل شوی او تازه په تازه په کابل کې په ښکلي صحافت سره چاپ شؤ.
په دې کتاب کې تاسو کولای شئ ډېر شمېر هغه (کولای شم) ولولئ چې مخکې مو په خپل زړه او ذهن کې درلودل څو پر مټ یې د پرمختګ او پوهېدلو لپاره له خنډونو او لوړو ژورو یوه خلاصه لاره جوړه کړو؛ خو تر دې مهاله مو جرئت او وړتیا نه درلوده.
د کتاب ليکوال ښاغلي محمد نعيم عطارد له ۸صبح پښتو مجلې سره په خبرو کې، د دې کتاپ په اړه داسې وويل:
«په ژوند کې پرلپسې ماتې، لوړې ژورې، د اړتیاوو او هیلو نه پوره کېدل، پر ځان باندې د باور نه درلودل، نامناسبه دنده، د ټولنې له ستونزو سره تحصیلي رشتې نامناسب والی او ګڼ شمېر نورې ستونزې او ناخوالې هغه عوامل دي چې د یو شخص لپاره د دروني ځور، غم او لسګونه نورو ستونزو د رامنځته کېدو لامل کېدای شي. کوم وګړي چې ډېر کله نور خلک د خپلو ماتو لامل بولي، معمولاً هغه کسان دي چې د بریالیتوب د لارې پیداکول ورته ډېر سخت او ان ناشوني ښکاري! په دې کتاب کې دې او دې ته ورته نورو ډېرو ستونزو ته د حل ډېرې معقولې لارې چارې وړاندې شوې دي».
دا ؤ د لیکوال نظر، اوس تاسو کولای شئ، د کتاب په لوستلو سره، خپل نظر او جاج ولرئ!