امام علي رحمان د آسیا د زړه هېوادونو په ناسته کې: د افغانستان ستونزه پوځي حل لاره نه لري

د تاجکستان ولسمشر امام علي رحمان د «آسیا د زړه هېوادونوـ د استانبول بهیر» د غړو هېوادونو د بهرنیو چارو وزیرانو په نهمه ناسته کې وویل چې د افغانستان کړکېچ پوځي حل لاره نه لري.
د آسیا د زړه هېوادونو ـ د استانبول بهیر د بهرنیو چارو وزیرانو نهمه ناسته د وري په لسمه نېټه د تاجکستان په پلازمیني دوشنبې کې ترسره شوه.
امام علي رحمان چې د ناستې لومړی وینا وال و، وویل چې په تېرو څلوېښتو کلونو کې په افغانستان کې د جګړې او تاوتریخوالي ترخې تجربې ښودلې چې دا جګړه پوځي حل لاره نه لري.
د تاجکستان ولسمشر زیاته کړه چې د افغانستان مسله یوازې په سیاسي هوکړه او د اقتصادي او ټولنیز پرمختګ په موخه په معاصرو لارو چارو کې حل کېدای شي.
امام علي رحمان په افغانستان کې د ترهګرو فعالیتونو، افراط پالنې، جرمونو او د نشه يي توکو د قاچاق په اړه اندېښنه څرګنده کړه او وې ویل چې ترهګرو او افراطي ډلو په افغانستان کې خپلو موخو ته د رسېدو لپاره وضعیت پېچلی کړی دی.
د تاجکستان ولسمشر ټینګار وکړ چې هېواد یې په افغانستان کې د سولې د ټینګښت لپاره په بین الافغاني مذاکراتو کې د افغانستان د اسلامي جمهوریت له دریځه ملاتړ کوي.
د تاجکستان ولسمشر همداراز ووېل چې په بین الافغاني مذاکراتو کې باید د ټولو افغانانو ګټو ته پام وشي او افغانان په خپله، خپل برخلیک وټاکي.
رحمان له نړیوالې ټولنې او د افغانستان د سولې په بهیر کې له ښکیلو هېوادونو وغوښتل چې په اوسنیو شرایطو کې له افغانانو سره همکاري وکړي.
د تاجکستان ولسمشر د افغانستان اوسنی وضعیت د خپل هېواد د ملي روغې جوړې له شرایطو سره پرتله کړ او وې وېل چې د تاجکستان د حکومت او مخالفینو ترمنځ لومړني مذاکرات په کابل کې ترسره شول او په ۱۹۹۷ کال کې د خبرو په وروستي پړاو کې په تالقان کې هوکړه لاسلیک شوه.
امام علي رحمان زیاته کړه چې هېواد یې د پخلاینې په برخه کې اوږده تجربه لري او چمتو دی چې په دې اړه له افغانستان سره همکاري وکړي.
د تاجکستان ولسمشر له نړیوالې ټولنې او نورو هېوادونو وغوښتل چې له افغانانو سره بې غرضه مرسته وکړي.
له بلې خوا، ددغې ناستې په څنډه کې افغانستان او تاجکستان په بېلابېلو برخو کې د همکارۍ پنځه سندونه لاسلیک کړل. د همکارۍ دغه سندونه د وري په نهمه نېټه د افغان ولسمشر محمد اشرف غني او د تاجکستان د ولسمشر امام علي رحمان په وړاندې د دواړو هېوادونو د ادارو ترمنځ لاسلیک شول.
ولسمشرۍ دفتر ویلي چې دغه موافقې په سیاسي، امنیتي، سوداګریزو، ترانزیتي، ترانسپورتي، کلتوري او د انرژۍ په برخو کې لاسلیک شوې دي.
د آسیا د زړه هېوادونوـ د استانبول بهیر د بهرنیو چارو د وزیرانو د ناستې د بحثونو اصلي موضوع د افغانستان د سولې بهیر و.