۸صبح، غزني: غزني، فاریاب، جوزجان او بادغیس ولایتونو کې سیمهییزې سرچینې وايي، چې په دغو ولایتونو کې د ښځو او ماشومانو په ګډون ۱۸ تنه د سړې هوا له امله مړه شوي دي.
ځایي سرچینې سه شنبه د مرغومي پر اووهویشتمه نېټه وایي، چې غزني کې په تېرو درېیو ورځو کې پر نشهیي توکو اخته او بېسرپناه کسان د سختې یخنۍ له امله مړه شوي دي.
د سرچینو په وینا د ۵ تنو مړي، چې هویت یې نه دی په داګه شوی د غزني د ښاروالۍ له خوا خښ شوي او د ۴ تنو نورو جسدونه خپلو کورنیو ته سپارل شوي دي.
د شمېرو له مخې په غزني کې تر ۱۰۰ زرو زیات روږدي کسان شتون لري، چې له دې منځه ۲۵ زره یې بېسرپناه دي.
په همدې حال کې جوزجان کې د طالبانو د اطلاعاتو او کلتور رییس سیفالدین معتصم وایي، چې د دغه ولایت د اقچې ولسوالۍ په کوهستانات کلي کې دوې ښځې او یو ماشوم د سړې هوا او د ګرمولو امکاناتو د نه لرلو له امله مړه شوي دي.
اخوا فاریاب کې د طالبانو د اطلاعاتو او کلتور رییس شمسالله محمدي د دغه ولایت په المار ولسوالۍ کې د سختې سړې هوا له امله د یوې ښځې او یوه ماشوم د له منځه تلو خبر ورکړی دی.
بادغیس کې ځایي سرچینې هم وایي، چې سړې هوا دوشنبه د مرغومي پر ۲۶ د دغه ولایت په ابکمري او بالامرغاب ولسوالیو کې د یوه سپینږیري او درېیو ماشومانو ژوند اخیستی دی.
د ویلو ده، چې په تېره یوه اونۍ کې بغلان او هرات ولایتونو کې د سختې یخنۍ له امله پر نشهیي توکو ۲۵ اخته کسانو هم ساه ورکړې ده.
