په ننګرهار ولایت کې به د تیر کال په پرتله د جلغوزو په حاصلاتو کې ۳۸ سلنه زیاتوالی راشي.تېر کال په دغه ولایت کې ۴۵۵ ټنه د جلغوزو حاصلات راټول شوي وو.
ننګرهار د هېواد په ختیځ کې له هغو ولایتونو څخه دی چې ۷۰۵۹۴,۴ هکتاره د چهارمغزو ، جلغوزو،نښترو او نورو مېوه اوغیر مېوه لرونکي طبیعي ځنګلونه لري، چې ۱۶,۵ سلنه یې د جلغوزو ونې دي. په حصارک، شیرزاد، خوږیانو، پچیراګام، هسکه مینه، کوټ، اچین او سپین غر ولسوالیو کې ۱۱۶۰۹.۲۶ هکتاره د جلغوزو طبیعي ځنګلونه دي.
د ننګرهار ولایت د کرنې ریاست مسوولین وایي چې د امنیتي ستونزو په لېرې کولو سره اټکل کېږي چې سږ کال د جلغوزو په حاصلاتو کې ۳۸ سلنه زیاتوالی راشي.
د دوی د معلوماتو له مخې سږ کال ۲۲۰ تنو ځنګل لرونکو ته د غوټو شکولو قیچي ګانې وېشل شوې، د جلغوزو ځنګل لرونکو ټولنې يې جوړې کړي، ځنګلونو د قطعي مخنیوی يې کړی او ځنګل لرونکو ته يې د ځنګلونو ساتنې او حاصل راټولولو په اړه عامه پوهاوی ورکړي.
اخو سوداګر وايي چې دولت دې د جلغوزو د پروسس او بسته بندۍ په برخه کې خپلې مرستې لا زیاتې کړي او په چين سربېره دې له نورو هېوادونو سره تړونونه لاسلیک کړي چې سوداګر پر یوه هېواد تکیه ونکړي او په نرخونو کې یې د کموالی مخه ونیول شي.
په ننګرهار سربېره کونړ،پکتیا،خوست،پکتیکا او یو شمېر نور ولایتونه د جلغوزیو طبیعي ځنګلونه لري چې دولت یې د پراختیا لپاره هڅې پیل کړې دي.