که څه هم تېر شل کاله د نشه يي توکو پر ضد د مبارزې وزارت میلیاردونه ډالر له نشه يي توکو سره د مبارزې په موخه ولګول؛ خو بیا هم د روږدو شمېر ورسره پام وړ ښکته نه شو.
د طالبانو په لاس د افغانستان تر نیولو وروسته پخواني نظامي سرتېري له کاره ګوښه شول، چې ګڼو يې د بېکارۍ له کبله نشه يي توکو ته مخه کړې ده.
دا روږدي ځوانان او ځینې پخواني سرتېري د دې چارې لامل بې روزګاري او ناوړه اقتصادي حالت یادوي.
سیال د کامې ولسوالۍ اوسېدونکی دی، کلونه د تېر نظام په لیکو کې سرتېری و؛ خو اوس په نشه روږدی شوی دی.
سیال له ۸ صبح ورځپاڼې سره په خبرو کې وویل: «تر دولسم ټولګي مې په ولسوالۍ کې زده کړې وکړې، بیا کابل پوهنتون کې د زراعت پوهنځي ته بریالی شوم؛ خو د ناوړه اقتصادي وضعیت له کبله مې بشپړ نه شوای کړی.»
سیال زیاتوي، د پوهنتون تر پرېښودو وروسته د ملي اردو لیکو ته تللی او پوره څلور کاله یې د ملي اردو په لیکو کې تېر کړي دي. د سیال په وینا، د ناسم اقتصادي وضعیت له کبله پر نشهیي توکو روږدی شوی دی.
نوموړي زیاته کړه: «کله چې تېر نظام له منځه لاړ، په کور شوم، له بې روزګارۍ په تنګ او د نشه يي موادو کارونه یې زیاته کړه. اوس کور کورنۍ ټول رانه پاتې دي.»
سیال چې اوس په نشه يي توکو د روږدو د درمنلې په روغتون کې بستر دی وایي، خوښ دی چې د نشې پرېښوولو چانس په لاس ورغلی دی.
نیوکې دا هم دي چې کوم روږدي په نشه یي توکو د روږدو روغتونونو ته وړل کېږي، درمل او نور لازم امکانات ورته نه برابرېږي؛ خو ننګرهار کې د طالبانو د سرپرست حکومت د عامې روغتیا رییس عطاالرحمن فاتح دا خبره نه مني.
نوموړي ۸صبح ورځپاڼې ته يې وویل: «په دې وروستیو کې په نشو روږدي ډېر شوي؛ خو موږ یې په تدریج د درملنې هڅه کوو، درمل او نور توکي ورته لرو؛ خو د خوړو په برخه کې دې بډایه هېوادوال د دوی لاسنیوی وکړي.»
فاتح همدارنګه وایي، په ننګرهار کې په نشه يي توکو د روږدو روغتون د ۱۵۰ تنو د بستر لپاره جوړ شوی؛ خو اوس له دغه شمېر څخه زیات روږدي بستر دی. د نوموړي په خبره، لس بستره په محبس کې هم شته او شل روږدي بیا په کورونو کې تر نظارت لاندې ساتي.
د خپرو شویو راپورونو له مخې، په افغانستان کې د روږدو شمېر نژدې ۲٫۵ میلیونو کسانو ته رسېږي.
ځینې کسان وايي، که ځوانانو ته د کارروزګار زمینه برابره او په هېواد کې د نشه يي توکو لویې کارخونې له منځه لاړې نه شي، ممکن د روږدو کچه به تر دې څو چنده نوره هم لوړه شي، چې له کبله به یې ګڼ نور مسلکي او لوستي ځوانان هم پرې روږدي شي.