د ترمذ ـ مزارشریف ـ پېښور د اورګاډي پروژه د طالبانو رژيم د نامشروع والي له امله ځنډول شوې
۸صبح، کابل: د رپوټونو له مخې، د ازبکستان ـ افغانستان ـ پاکستان د اورګاډي پروژه د طالبانو رژيم د نامشروع والي او ددې رژيم له بشري حقونو د سرغړونې له امله، ځنډول شوې ده.
اروپايي رسنیو چهارشنبې د نومبر په شپاړسمه رپوټ ورکړی چې دا پروژه له بشري حقونو د پرلپسې سرغړونو او د شریعت له قوانینو (ځانګړي تفسیر) ته په پام سره، د طالبانو تر واک لاندې افغانستان سره د همکارۍ په اړه د ځینو اندېښنو له امله، ځنډول شوې ده.
ازبکستاني چارواکو ویلي چې د منځلاري حکومت د جوړولو په اړه د طالبانو له ژمنو سره سره، دې ډلې اوس د شریعت قوانینو اجرا (په ځانګړي تفسیر سره) لومړیتوب ورکړی دی.
د تازه ترسره شویو اټکلونو له مخې، دا رېل لاره چې ۵۷۳ کیلومتره اوږدوالی لري او ۵،۹۶ میلیارد ډالره لګښت به ولري.
د ویلو ده چې دا رېل لاره چې د ازبکستان د ولسمشر شوکت میرضایف له خوا د «پېړۍ پروژه» بلل شوې، تر لیرې واټن پورې د افغانستان د ترانزیت له پیاوړتیا سره مرسته کولای شي.
د ازبکستان د رېل لارې ادارې رییس اکمل کمالوف ویلي چې دا پروژه به د پینځه میلیونه کاري فرصتونو د برابرېدو لامل شي او پر ټوله لاره به ۱۵ میلیونه وګړي ترې برخمن شي.
ازبکستان، افغانستان او پاکستان دا تړون د ۲۰۲۱ میلادي کال په فبرورۍ میاشت کې د طالبانو له واکمنۍ مخکې له سویلي آسیا سره د منځنۍ آسیا د نښلولو په موخه لاسلیک کړی و.
