د احصايې او معلوماتو ملي ادارې رهبري پلاوي تېره ورځ ولسمشر غني سره په ناسته کې د يادې اداې د فعاليتونو او لاسته راوړنو په هکله خپل راپور نوموړي ته وړاندې کړ.
دغه ناسته چې په ولسمشرۍ ماڼۍ کې وشوه د احصایې او معلوماتو ملي ادارې رئیس احمد جاوید رسولي د یادې ادارې د کړنو، اجرااتو او ننګونو د راپور وړاندې کولو پر مهال وویل، یوازې د روان کال په وري او غویي میاشتو کې ۱.۵ میلیون برښنایي پژندپاڼې وېشل شوي او په ټوليز ډول د ۴.۵ میلیونو نورو پراوونه بشپړ شوي دي.
د ولسمشرۍ ماڼۍ لخوا په خپرې شوې خبرپاڼه کې راغلي، ولسمشر په خپلو خبرو کې ويلي چې د احصایې او معلوماتو ملي ادارې ستونزو د حل په اړه پرمختګونه شوي، خو لا زیاتو اقداماتو ته اړتیا ده.
ولسمشر غني همداراز په افغانستان کې د معلوماتو پر دیجیټلي کولو ټينګار کړی او ويلي يې دي چې د معلوماتو او سروې څېړنه د نړيوالو منل شویو معیارونو مطابق ترسره شي او رامنځته شوي سیستمونه دې په معیاري ډول پیاوړي شي.
الکترونيکي پېژندپاڼو کې د «قوميت» مسئلې پر سر نيوکې اوس هم کله ناکله پورته کېږي، خو د يادې ادارې د مسؤلينو په وينا په دې برخه کې دمګړی څه ستونزه نشته او د تذکرو د وېش لړۍ په چټکۍ روانه ده.
